საქართველოს ფინანსთა სამინისტროს საგამოძიებო სამსახური საქართველოში სპირტის კონტრაბანდასთან დაკავშირებით, სპეციალურ განცხადებას ავრცელებს.
"2006-2007 წლებში საქართველოში შეიქმნა შეზღუდული პასუხისმგებლობის საზოგადოებები, რომლებიც 2012 წლის ოქტომბრამდე ფუნქციონირებდნენ და რომელთაც საქართველოში ხორბლის 96%-იანი სპირტის შემოტანა, გადამუშავება, დაძველება და შემდეგ მისი რეექსპორტისა და ექსპორტის რეჟიმებით საზღვარგარეთ გატანა უნდა განეხორციელებინათ. აღნიშნულ ვითომდა ერთმანეთისგან დამოუკიდებელ შპს-ებს, ფიქტობრივად, დანიშნული დირექტორების ნაცვლად, მართავდნენ ერთი და იგივე პირები, რომელნიც შემდეგი დანაშაულებრივი სქემით მოქმედებდნენ:
ერთ კომპანიას - შპს "განთიადს" უკრაინიდან საქართველოში შემოჰქონდა ხორბლის 96%-იანი სპირტი, რომელსაც გადამუშავების რეჟიმში აქცევდა და ყიდვა-გაყიდვის შესაბამისი პროცედურების გარეშე გადასცემდა მეორე კომპანიას - შპს "ნაფარეულს", რომელიც თავისმხრივ, ტექნოლოგიური "მანიპულაციებით" ხორბლის სპირტისგან ღებულობდა საკონიაკე სპირტს.Kკომპანია "განთიადს" სჭირდებოდა გადამუშავების რეჟიმში მოქცეული ხორბლის სპირტის დოკუმენტალური "განაშთვა", რომელიც რეალურად მას უკვე გადაცემული ჰქონდა ქვეყნის შიგნით კომპანია "ნაფარეულისთვის", - ნათქვამია უწყების განცხადებაში.
საგამოძიებო სამსახურში განმარტავენ, რომ ამის შემდეგ, სქემაში ერთვებოდა საქართველოს საბაჟო სამსახური, რომლის თანამშრომლებიც საბაჟო დეკლარაციებსა და აღრიცხვის მოწმობებში ყალბი მონაცემების შეტანით, ასრულებდნენ საბაჟო პროცედურებს და ადასტურებდნენ საბაჟო დოკუმენტაციის სისწორეს, რის მიხედვითაც საქონელმა ვითომდა, დატოვა საქართველოს ტერიტორია.
"ამავე სქემით ყალბდებოდა საბაჟო დოკუმენტაცია ხორბლის სპირტის ტრანზიტის დროსაც. საქონელი იმპორტის რეჟიმში მოქცევისა და საბაჟო გადასახდელების გადახდის გარეშე იყიდებოდა საქართველოს ტერიტორიაზე, ხოლო შემდეგ საბაჟო სამსახურის მონაწილეობით, საბაჟო დეკლარაციებში ყალბი მონაცემების შეტანით, ფიქსირდებოდა რომ საქონელმა თითქოს დატოვა საქართველოს ტერიტორია. ზემოაღნიშნულმა დანაშაულებრივმა ქმედებებმა სახელმწიფოს მიაყენეს ათეულობით მილიონი ლარის ოდენობის ზიანი. აღნიშნულ ფაქტებთან დაკავშირებით აღძრულია სისხლის სამართლის საქმე და ძიებას აწარმოებს ფინანსთა სამინისტროს საგამოძიებო სამსახური. დაკავებულნი არიან კომპანიების ფაქტიური მმართველები და საბაჟო მოხელეები. ძიების მსვლელობისას გამოიკვეთა დანაშაულებრივ სქემაში ჩართული სხვა კომპანიების მონაწილეობაც", - აცხადებენ საგამოძიებო სამსახურში.
