ირლანდიის პრემიერ-მინისტრმა მაიკლ მარტინმა, რომლის ქვეყანა 1 ივლისიდან ევროკავშირის საბჭოს ექვსი თვით უხელმძღვანელებს, განაცხადა, რომ უკრაინელი ხალხი ევროკავშირში წევრობას იმსახურებს და გამოთქვა იმედი, რომ უკრაინის გზაზე მეზობელ ქვეყნებთან არსებული სირთულეები გადაილახება.
ამის შესახებ მან დუბლინში, ვოლოდიმირ ზელენსკისთან გამართულ ერთობლივ პრესკონფერენციაზე განაცხადა.
მარტინმა სიტყვა მას შემდეგ აიღო, რაც ზელენსკიმ იმედი გამოთქვა, რომ პოლონეთი და უნგრეთი უკრაინის ევროკავშირში გაწევრიანებას ხელს არ შეუშლიან.
„უპირველეს ყოვლისა, ევროკავშირში გაწევრიანება არის ის, რასაც უკრაინელი ხალხი იმსახურებს და რაც მას სჭირდება. სწორედ ამისთვის იბრძვიან ისინი საკუთარი ქვეყნის დაცვით. მათ სურთ ევროპული ცხოვრების წესი და მასთან დაკავშირებული ყველა თავისუფლება. ეს ჩვენი მთავარი მიზანი უნდა იყოს. რუსეთმა ამ ომში ვერ უნდა გაიმარჯვოს“, - განაცხადა მარტინმა.
პოლონეთთან არსებული უთანხმოებისა და უნგრეთის წინააღმდეგობის კომენტირებისას მან აღნიშნა, რომ ევროკავშირში გაწევრიანების პროცესში ორმხრივი პრობლემები ახალი არ არის.
„ასეთი შემთხვევები დასავლეთ ბალკანეთშიც გვქონია. ჩვენი ამოცანაა, ეს გამოწვევები დავძლიოთ. ამას ჩვენი საკუთარი ისტორიაც ადასტურებს“, - თქვა მან და მაგალითად მოიყვანა დიდი პარასკევის შეთანხმება, რომელმაც ჩრდილოეთ ირლანდიაში მრავალწლიანი სისხლიანი ეთნოპოლიტიკური კონფლიქტი დაასრულა.
„ვფიქრობ, უნგრეთში არჩევნების შემდეგ განვითარებული მოვლენები სუფთა ჰაერის ნაკადივით იყო. ვიმედოვნებთ, ეს ტენდენცია გაგრძელდება და ხელს შეუწყობს უკრაინისთვის მოლაპარაკებების ახალი კლასტერების გახსნას“, - დასძინა მარტინმა.
მისი თქმით, ირლანდია კონსტრუქციულად იმუშავებს ყველა მხარესთან, რათა ეს შესაძლებელი გახდეს.
შეგახსენებთ, ირლანდია ევროკავშირის საბჭოს თავმჯდომარე ქვეყანა გახდა.
ირლანდია ევროკავშირის საბჭოს თავმჯდომარე ქვეყანა 2027 წლის პირველ იანვრამდე იქნება.
