საქართველოს პრემიერ მინისტრი საქართველოს ჯარში აქამდე არსებულ და მიმდინარე ვითარების შესასწავლად ნატო-ს სპეციალური ჯგუფის შექმნას სთხოვს, რომელიც არსებულ ვითარებას დაადგენს, - ამის შესახებ განაცხადება პრემიერ-მინისტრმა ბიძინა ივანიშვილმა ტელეკომპანია "მეცხრე არხთან" განაცხადა.
"ნატოსაც შეუძლია სამუშაო ჯგუფი შექმნას და ჩვენთან ერთად მიიღოს მონაწილეობა იმის გარკვევაში, თუ რა ხდებოდა ქართულ ჯარში და რა ხდება ახლა. სიამოვნებით შევთავაზებ ამას ბატონ რასმუსენს", - განაცხადა ივანიშვილმა.
ბიძინა ივანიშვილი ინიციატივას ანდერს ფოგ რასმუსენს შეხვედრისას პირადად გააცნობს.
ივანიშვლმა სამხედრო მაღალჩინოსნების დაკავებაზეც ისაუბრა და აღნიშნა, რომ სამხედროების დაკავება ნებისმიერი ქვეყნისთვის სირცხვილია და ევროპელების მიერ გაკეთებული განცხადებები ჯანსაღ რეაქციად შეაფასა.
"ყოფილი ხელისუფლება ცდილობს ეს ანგარიშსწორებად წარმოაჩინოს, მაგრამ სინამდვილე სულ სხვაა. რა თქმა უნდა, აღმაშფოთებელია ის, რომ პროკურატურა იძულებულია გენერალური შტაბის უფროსი დააკავოს. სირცხვილია, რომ ყოფილი შინაგან საქმეთა და თავდაცვის მინისტრის დაკავება მოხდა. ჩვენც უკმაყოფილოები ვართ და განიცდიან ევროპელებიც. ასე რომ, მათი რეაქცია ნორმალური და ჯანსაღია", - აღნიშნა პრემიერ-მინისტრმა.
შეგახსენებთ, რომ ნატო-ს გენერალურმა მდივანმა, ანდერს ფოგ რასმუსენმა არჩევნების შედეგად მოსული ახალი მთავრობის მიერ ოპონენტების დაკავების გამო შეშფოთება გამოთქვა. "როიტერის" ცნობით, რასმუსენმა საქართველოს მთავრობას მოუწოდა, რომ სასამართლო პროცესები პოლიტიკური ჩარევისგან თავისუფალი იყოს.
"მე უკიდურესად შეწუხებული ვარ არჩევნების შემდეგ განვითარებული მოვლენებით, რომელიც საქართველოში პოლიტიკური ოპონენტების დაკავებას უკავშირდება. ამ საკითხების გადაწყვეტა სასამართლო სისტემის პრეროგატივაა, მაგრამ ცხადია, მნიშვნელოვანია, რომ ასეთი საქმეები პოლიტიკური ჩარევის გარეშე განიხილებოდეს. ჩვენ განსაკუთრებული ყურადღებით დავაკვირდებით მოვლენების განვითარებას ამ მიმართულებით", - განაცხადა რასმუსენმა პრაღაში, ნატო-ს საპარლამენტო ასამბლეის სხდომაზე.