როგორც "ჯი-ეიჩ-ენს" საპატრიარქოსთან არსებული ახალგაზრდული მოძრაობა "დავითიანნი"-დან აცნობეს, უწმინდესის კურთხევით, "დავითიანნის" ორგანიზებით, ქალაქის სხვადასხვა ადგილიდან მეტეხის ხიდისკენ მსვლელობები მოეწყობა. კერძოდ, დიდუბის პანთეონიდან მეტეხის ხიდის მიმართულებით მსვლელობა 14:00 საათზე დაიწყება. მეტროს სადგურ "ისნიდან" და სპორტის სასახლის მიმდებარე ტერიტორიიდან ერთდროულად 15:00 საათზე დაიწყება.

მსვლელობის მონაწილეებს თბილისის სხვადასხვა ტაძრების მომლოცველები შეუერთდებიან. პარაკლისი კი მეტეხის ხიდზე 17:00 საათზე შესრულდება, რომლის დასრულების შემდეგ მოწამეთა პატივსაცემად მტკვარში ყვავილები ჩაიყრება.

პარაკლისის დაწყებამდე მეტეხის ხიდზე გაიმართება კონცერტი, რომელშიც მონაწილეობას ხალხური ანსამბლები და ფოლკლორული გუნდები მიიღებენ. "ერთად მივაგოთ პატივი ჩვენს გმირ წმინდან წინაპრებს. გვახსოვდეს მათი ღვაწლი და თავდადება ჩვენი ქვეყნის, ერისა და ეკლესიის წინაშე", _ აცხადებენ ახალგაზრდულ მოძრაობაში.

წმ. ასი ათასი ქართველი მოწამე, ჯალალ ედინის ბრძანებით, ხვარაზმელების მიერ სარწმუნოებისთვის მე-13 საუკუნეში აღესრულა. მეტხის ხიდზე მოწამეებს უფლისა და ღვთისმშობლის ხატების შეურაცხყოფა უბრძანეს. ხვარაზმელებმა მათ თავები მოკვეთეს და მტკვარში ჩაყარეს.