პოლიტიკური ნიშნით დაპატიმრებული და დევნილი პირების საკითხების შემსწავლელი სამუშაო ჯგუფისათვის ვადის გაგრძელებაზე ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე იმსჯელებენ და, საჭიროების შემთხვევაში, ჯგუფს ვადას გაუგრძელებენ, - ამის შესახებ განცხადება დღეს კომიტეტის თავმჯდომარემ, ეკა ბესელიამ გააკეთა.
როგორც ეკა ბესელიამ აღნიშნა, ადამიანის უფლებათა დაცვისა და სამოქალაქო ინტეგრაციის კომიტეტთან პოლიტიკური ნიშნით დაპატიმრებულთა და დევნილ პირთა საკითხების შემსწავლელი სამუშაო ჯგუფი შეიქმნა, რომელიც სხვადასხვა არასამთავრობო ორგანიზაციების მიერ მოწოდებულ 185 პატიმრისა და ძებნაში მყოფი 13 დევნილის სიას შეისწავლის და კომიტეტს შესაბამის დოკუმენტაციას მიაწვდის. მისივე განმარტებით, პოლიტიკური ნიშნით დაპატიმრებულთა და დევნილთა სია დროულად უნდა გადაიხედოს, რადგან უსამართლოდ დაპატიმრებული ადამიანებისთვის საპატიმროებში უკანონოდ გატარებული ყოველი დღე სასიცოცხლოდ მნიშვნელოვანია. სწორედ ამით იხელმძღვანელა კომიტეტმა, როდესაც ჯგუფის შექმნისას, მუშაობის ვადა 2 კვირით განსაზღვრა, თუმცა, ეკა ბესელიას განცხადებით, ორმა არასამთავრობო ორგანიზაციამ, კერძოდ, ახალგაზრდა იურისტთა ასოციაციამ და „კონსტიტუციის 42-მუხლმა" აღნიშნული ვადა არასაკმარისად მიიჩნიეს.
„თუ ვადა საკმარისი არ არის, მზად ვართ, კომიტეტის სხდომაზე მისი გაგრძელების თაობაზე ვიმსჯელოთ, ასევე განვიხილოთ ყველა ის მოსაზრება და წინადადება, რომელსაც სამუშაო ჯგუფის წევრები მოგვაწვდიან",- განაცხადა ეკა ბესელიამ.
მისივე თქმით, კომიტეტმა ჯგუფის შექმნისას გაიზიარა არასამთავრობო ორგანიზაციების მოსაზრება, მის შემადგენლობაში არ შესულიყვნენ პოლიტიკოსები და სამთავრობო სტრუქტურის წარმომადგენლები.
როგორც კომიტეტის თავმჯდომარემ აღნიშნა, პოლიტიკური ნიშნით დაპატიმრებულთა და დევნილთა სტატუსის მინიჭების საკითხს ჯგუფი დამოუკიდებლად სწავლობს. კომიტეტი ხელს უწყობს უფლებადამცველებს, იმუშაონ ნაყოფიერად. ჯგუფის მიერ კომიტეტისთვის მიწოდებული დასკვნების საფუძველზე და პოლიტიკური ნიშნით დაპატიმრებულთა და დევნილთა სტატუსის განსაზღვრის შემდეგ, პარლამენტი გათავისუფლების მექანიზმის შესახებ იმსჯელებს. „ჩვენ გავაგრძელებთ კონსტრუქციულ მუშაობას ჯგუფის წევრებთან, რომ საქართველოს არ ჰყავდეს პოლიტიკური ნიშნით დაპატიმრებული და დევნილი ადამიანები", - განაცხადა ეკა ბესელიამ.
