აჭარის ავტონომიური რესპუბლიკის მთავრობის თავმჯდომარის თანამდებობაზე სამი კანდიდატი განიხილება - ამის შესახებ ჟურნალისტებს კოალიცია "ქართული ოცნების" ლიდერმა ბიძინა ივანიშვილმა განუცხადა.
ბიძინა ივანიშვილის განცხადებით, გარდა არმაზ ახვლედიანისა, საუბარია ჯემალ ფუტკარაძესა და არჩილ ხაბაზის კანდიდატურებზე. ბიძინა ივანიშვილი პრეზიდენტს მოუწოდებს, უმაღლესი საბჭოს მოწვევა დააჩქაროს და პარასკევისთვის მთავრობის თავმჯდომარის პოსტზე ერთ-ერთ კანდიდატზე ის უკვე ჩამოყალიბებული იქნება.
"გუშინ არმაზ ახვლედიანთან მქონდა შეხვედრა, ახლა კი, აჭარის რეგიონის მაჟორიტარებს, უმაღლესი საბჭოს თავმჯდომარეს და უმრავლესობის წევრებს შევხვდი. აჭარის მთავრობის ხელმძღვანელის კანდიდატურასთან დაკავშირებით გავაგრძელეთ კონსულტაციები და ძალიან საინტერესო შეხვედრა გამოგვივიდა. ჩვენ გვქონდა მცდელობა, წინ წავსულიყავით. დეპუტატებმა მე და ჩემს გუნდს მოგვანდეს საკითხის გადაწყვეტა", - განაცხადა ბიძინა ივანიშვილმა.
