კინოფესტივალზე წარდგენილია ქართველი რეჟისორის, რუსუდან ჭყონიას ფილმი "Keep Smiling".
მხატვრული ფილმი, რომელიც მრავალშვილიანი დედების სილამაზის კონკურსის თემაზეა გადაღებული, რეჟისორის პირველი ნამუშევარია, რომელიც ვენეციის კინოფესტივალზე მოხვდა.

"ფილმში ნაჩვენები არიან კონკურსანტი ქალები, რომლებსაც განსხვავებული ისტორია, სოციალური სტატუსი და მიზეზი აქვთ კონკურსში მონაწილეობის. თუმცა, საბოლოო ჯამში, ისინი მათი წარმოდგენებიდან განსხვავებულ რეალობაში აღმოჩნდებიან," - ამბობს რეჟისორი რუსუდან ჭყონია.

ვენეციის კინოფესტივალს რემდენიმე ავტონომიური სექცია აქვს, ერთ-ერთი მათგანია "ვენეციის დღეები". "ვენეციის დღეების" ფარგლებში 12 ძირითადი ფილმი ირჩევა, რომელთა შორის მოხვდა ქართველი რეჟისორის ნამუშევარი.

ფილმი სამი ქვეყნის: საქართველოს, საფრანგეთისა და ლუქსემბურგის ერთობლივი ნამუშევარია. ფილმის გადაღებები საქართველოში შპს "ქართული კინოს განვითარების ცენტრის" და საქართველოს კულტურისა და ძეგლთა დაცვის სამინისტროს მხარდაჭერით მიმდინარეობდა.

რუსუდან ჭყონია ფილმის რეჟისორი, პროდუსერი და სცენარის ავტორიცაა. როგორც თავად ამბობს, ფილმმა ვენეციამდე მისაღწევად საკმაოდ რთული გზა გაიარა.

"ფილმის გადაღება მიმდინარეობდა რუსთაველის თეატრში, თეატრის დატვირთული გრაფიკის გამო გადაღებებს ღამის 11 საათზე ვიწყებდით. მე უჰონორაროდ ვმუშაობდი, ასევე, ძალიან მცირე იყო მსახიობების ჰონორარიც. ნახევარი ანაზღაურებით იმუშავეს ასევე მემონტაჟეებმა, თუმცა, როგორც ჩანს, ეს შრომა წარმატებული გამოდგა," - ამბობს რუსუდან ჭყონია.

მხატვრულ ფილმში ცნობილი და დებიუტანტი ქართველების ნახვაა შესაძლებელი: ია სუხიტაშვილი, ნანა შონია, ოლიკო ბაბლუანი, თამუნა ბუხნიკაშვილი, შორენა ბეგაშვილი, ია ნინიძე, ნანა ჩიჩუა, გია როინიშვილი და სადებიუტო როლით ბექა ელბაქიძე.

რეჟისორი რუსუდან ჭყონია იმედოვნებს, რომ მსოფლიო პრემიერის შემდგომ ფილმის ჩვენება საქართველოში შემოდგომაზე ან ზამთარში მოხერხდება.
ვენეციის კინოფესტივალი 8 სექტემბრამდე გასტანს.