"ბოლო თვეების განმავლობაში კანონის უგულვებელყოფის და ამომრჩევლის მოსყიდვის მცდელობის შემაშფოთებელი ფაქტების წინაშე დავდეგით"- ამის შესახებ შს მინისტრის პირველმა მოადგილემ ეკატერინე ზღულაძემ განაცხადა.
ზღულაძის განმარტებით, საპარლამენტო არჩევნების მოახლოებასთან ერთად, საქართველოში ისევე, როგორც სხვა ყველა დემოკრატიულ სახელმწიფოში არსებობს კანონი, რათა არ იქნას დაშვებული ამომრჩევლის მოსყიდვა და არჩევნების გაყალბება.
"ძალიან ცხადად მინდა დავაფიქსირო: რატომ ენდობა საქართველოს მოსახლეობა საქართველოს სახელმწიფო ინსტიტუტებს? - იმიტომ რომ ეს ინსტიტუტები ემსახურება მათ;
რატომ გახდა საქართველო კანონმორჩილი ქვეყანა? - იმიტომ რომ კანონი ერთია ყველასთვის; რატომ არის საქართველოს სახელმწიფო ძლიერი? - იმიტომ რომ ის დგას სისტემებზე და არა პიროვნებებზე.
ჩვენ არ მივცემთ უფლებას არცერთ პიროვნებას, არცერთ პოლიტიკურ პარტიას, შეარყიოს საქართველოს სახელმწიფოს ეს ამოსავალი პრინციპები.
ძალიან სამწუხაროა, რომ ბიძინა ივანიშვილი და პარტია "ქართული ოცნება", როგორც სჩანს, ფიქრობს, რომ კანონზე მაღლა დგანან და მუდმივად, მიზანმიმართულად ცდილობენ დაასუსტონ კანონი და შესაბამისად დემოკრატია ამ ქვეყანაში"- აღნიშნა ბრიფინგზე ზღულაძემ.
მისივე ინფორმაციით, საქართველოს პოლიციის სხვადასხვა ქვედანაყოფებში მუდმივად მიმდინარეობს გეოგრაფიული და სამსახურებრივი როტაციის პროცესი.
"არასოდეს დასმულა კითხვის ნიშანი ამ გადაადგილებებთან დაკავშირებით, იმიტომ რომ ძალიან ცხადია, რომ ამ როტაციების მიზანი მხოლოდ და მხოლოდ თანამშრომლების გადახალისება, ბიუროკრატიული მოდუნების თავიდან აცილება და ეფექტური მუშაობის უზრუნველყოფაა. ამჟამად უკვე ყოფილმა პოლიციელებმა წინასწარი პოლიტიკური კავშირების გამო არ ისურვეს როტაციაში მონაწილეობა, დატოვეს პოლიცია და შეეცადნენ აქედან სკანდალის აგორებას.
ეს მცდელობა დარჩება მცდელობად - ანუ შეუმდგარ ცდად"- აცხადებს მინისტრის მოადგილე.
ზღულაძე აცხადებს, რომ საქართველოს პოლიციას აქვს ხალხის ნდობა, იმიტომ რომ ხალხმა იცის, რომ პოლიცია ემსახურება საქართველოს სახელმწიფოს, ხალხს და არა ერთპოლიტიკურ ჯგუფს, ერთ პირს ან ერთ ამბიციას!
"სე რომ, პოლიცია ჩვეული კანონით განსაზღვრული წესით განაგრძობს მუშაობას, მათ შორის იმისათვის, რომ თავისი კომპეტენციის ფარგლებში უზრუნველყოს დემოკრატიული არჩევნების ჩატარება და აგრეთვე, თავისი კომპეტენციის ფარგლებში განაგრძობს დანაშაულის პრევენციას და გამოვლენილ ფაქტებზე რეაგირებას, მათ შორის ამომრჩევლის მოსყიდვის ფაქტებზე რეაგირებას.
ერთი ასეთი კონკრეტული გამოძიება ეხება ,,გლობალ კონტაქტკონსალტინგის" სატელიტურ ანტენებს: გუშინ პოლიციამ სასამართლო გადაწყვეტილების საფუძველზე, ამომრჩევლის მოსყიდვის სავარაუდო ფაქტზე, გამოძიების ფარგლებში, დროებით დააყადაღა დასაწყობებული სატელიტური ანტენები. ამ საქმეს არაფერი აქვს საერთო მედიის ხალმისაწვდომობასთან, სიტყვის თავისუფლებასთან და ასე შემდეგ! საქმე ეხება კონკრეტული პოლიტიკური ამბიციების მქონე პირის მიერ კონკრეტული პარტიის წინასაარჩევნო აგიტაციის ფარგლებში, კონკრეტული ამომრჩევლისთვის, კონკრეტული მატერიალური ქონების უფასოდ გადაცემას - შესაბამისად, ამომრჩევლის შესაძლო მოსყიდვას, რაც დანაშაულია და კანონით ისჯება"- აღნიშნა შს მინისტრის მოადგილემ.
მოსივე განმარტებით, სამინისტრო განაგრძობს არჩევნების გაყალბების, ამომრჩეველთა მოსყიდვის ნებისმიერ მცდელობასთან დაკავშირებით, ძალიან მკაფიო და მკაცრ ნულოვანი ტოლერანტობის პოლიტიკას.
" ეს არ ნიშნავს, რომ რომელიმე კონკრეტული პოლიტიკური სუბიექტი განსაკუთრებული ინტერესის საგანი არის ან გახდება; ეს ნიშნავს, რომ კანონის აღსრულებისას არ იქნება კომპრომისები. თუმცა, მეორეს მხრივ, სახელმწიფო იქნება ძალიან ღია ნებისმიერ ახალ იდეასთან მიმართებაში, თუ ის შესაძლებლობას მოგვცემს, კიდევ უფრო ღია და სამართლიანი გავხადოთ წინასაარჩევნო გარემო.
როგორც თავისუფალი და სამართლიანი არჩევნების სახელმწიფო კომისიის წევრი, ვაცხადებ, რომ რა თქმა უნდა, სახელმწიფოს ვალდებულებაა უზრუნველყოს, რომ თითოეულ პოლიტიკოსს ჰქონდეს თითოეულ ამომრჩევლამდე სათქმელის მიტანის სრული შესაძლებლობა. საქართველოსკანონმდებლობა ამ მხრივ ძალიან ლიბერალური და ღიაა. საქართველო ღია და ემოკატიულიქვეყანაა, სადაც ეს უფლება გარანტირებულია, მაგრამ ჩვენ ვსაუბრობთ პარლამენტთან იმაზე, თუ რა დამატებითი ინიციატივები შეიძლება განხორციელდეს იმისათვის, რომ წინასაარჩევნო კამპანიის პერიოდში ამომრჩეველს მრავალმხრივი ინფორმაციის მიღება გაუმარტივდეს"- განაცხადა ეკა ზღულაძემ.
