,,როგორც იცით საქართველოში კონკრეტულად კი ბათუმში გუშინ ამერიკის სახელმწიფო მდივანი ჩამოვიდა. ვიზიტი ბათუმში ორი დღის განმავლობაში გაგრძელდება. გრაფიკი საკმაოდ დატვირთულია", _ განაცხადა პრეზიდენტის პრესსპიკერმა მანანა მანჯგალაძემ, რომელმაც აღნიშნა, რომ ჰილარი კლინტონთან რამდენიმე მნიშვნელოვანი შეხვედრა უკვე გაიმართა.

"უკვე შედგა სახელმწიფო მდივანსა და საქართველოს პრემიერ მინისტრის პირისპირ შეხვედრა. შეხვედრის შემდეგ დაიწყო საქართველო-ამერიკის სტრატეგიული ქარტიის ფარგლებში პლენარული სხდომა, რომელიც პრემიერ-მინისტრმა და სახელმწიფო მდივანმა გახსნა. გაკეთდა გარკვეული აქცენტები და კიდევ ერთხელ დაზუსტდა პრიორიტეტები. შეხვედრას ესწრებოდნენ, როგორც ამერიკის სახელმწიფო დეპარტამენტის წარმომადგენლები ასევე სხვადასხვა უწყების წარმომადგენლები: საქართველოს პრემიერ-მინისტრი და საქართველოს საგარეო საქმეთა მინისტრი ", _ განაცხადა მანანა მანჯგალაძემ და აღნიშნა, რომ ქარტიის ფარგლებში გამართული პლენარული სხდომა 4 ძირითადი თემატური ჯგუფის მიხედვით წარიმართა.

,,მუშაობა, როგორც იცით, გაგრძელდა ქარტიის ოთხი თემატური ჯგუფის მიმართულებით".

პრეზიდენტის პრესსპიკერის ინფორმაციით, მიხელ სააკაშვილსა და ჰილარი კლინტონს შორის შეხვედრა დღის მეორე ნახევარში გაიმართება.

,,ვიზიტის მთავარი შეხვედრა შედგება საქართველოს პრეზიდენტთან. მოლაპარაკება ჩანიშნულია დღის მეორე ნახევარში და საუბარი შეეხება იანვარში ვაშინგტონში ორ ქვეყნის პრეზიდენტს შორის მიღებულ გადაწყვეტილებას და საუბარი ბუნებრივია შეეხება ორ ქვეყანას შორის სტრატეგიულ სამომავლო გეგმებს.
მისივე თქმით, მედიის წარმომადგენლებისთვის ერთობლივი პრესკონფერენცია გაიმართება და ჟურნალისტები სააკაშვილისა და კლინტონის შეხვედრის დეტალების შესახებ ინფორმაციის მიღებას შეძლებენ.

,,მედიის წარმომადგენლებს შეგეძლებათ მოისმინოთ შეხვედრის დეტალები იმ ერთობლივ პრესკონფერენციაზე, რომელიც მიხეილ სააკაშვილისა ჰილარი კლინტონის შეხვედრის დასრულების შემდეგ გაიმართება".

შეგახსენებთ: ჰილარი კლინტონი საქართველოში კავკასიური ტურნეს ფარგლებში იმყოფება.