ამერიკელმა დემოკრატმა სენატორმა, ადამ შიფმა განაცხადა, რომ აშშ-ის თავდაცვის მდივანმა, პიტ ჰეგსეთმა სენატის წინაშე უნდა მისცეს ჩვენება უკრაინაში Starlink-ის მუშაობის შეზღუდვებთან დაკავშირებით, რადგან ამან უკრაინის თავდაცვის ძალების ოპერაციებს ხელი შეუშალა. ამის შესახებ მან NBC-ის ეთერში ისაუბრა.
შიფის განცხადებით, ჰეგსეთის სენატის წინაშე წარდგენა შესაძლოა მას შემდეგ მოხდეს, რაც დემოკრატები სენატზე კონტროლს დაიბრუნებენ. მისივე თქმით, ჩვენების მისაცემად შეიძლება სხვა პირიც დაიბარონ, რომელსაც ინფორმაცია აქვს იმის შესახებ, თუ რატომ დაწესდა ეს შეზღუდვები.
გამოცემა უკრაინის პრეზიდენტის, ვოლოდიმირ ზელენსკის განცხადებასაც იხსენებს, რომლის თანახმადაც, Starlink-ის მუშაობის შეზღუდვის შესახებ გადაწყვეტილება აშშ-ის მთავრობიდან მიიღეს.
ამასთან, მედიის ცნობით, აშშ-ის პრეზიდენტმა დონალდ ტრამპმა ილონ მასკს პირადად დაურეკა და სთხოვა, თავისი კომპანიის სატელიტური მომსახურებისთვის დაწესებული შეზღუდვები მოეხსნა.
„პრეზიდენტი ერთ რამეს ამბობს, ილონ მასკი - მეორეს, თანაც ორივე სხვადასხვა დროს განსხვავებულ განცხადებებს აკეთებს. აქ ვიღაც იტყუება. შესაძლოა, ყველა მათგანი იტყუება, ოღონდ სხვადასხვანაირად, მაგრამ ეს უნდა გავარკვიოთ“, - განაცხადა შიფმა.
მისივე თქმით, მსოფლიოში ყველაზე მდიდარი ადამიანი არ უნდა აკონტროლებდეს ეროვნულ უსაფრთხოების ინტერესებს.
