ხვალ, 24 აპრილს, 11:00 საათზე, სასტუმრო "ამბასადორში" აღსრულების ეროვნული ბიურო ქართული საბანკო და სადაზღვევო სექტორისთვის ახალი სერვისის, "გამარტივებული წარმოების", პრეზენტაციას გამართავს. როგორც ცნობილია, გამარტივებული წარმოების სერვისის ამოქმედებას აღსრულების ეროვნული ბიურო მაისის დასაწყისიდან გეგმავს.
ამ ეტაპზე გამარტივებულ წარმოებას მხოლოდ საქართველოს სასამართლოები ახორციელებენ. წარმოების ეს ფორმა ფულად ვალდებულებებთან დაკავშირებულ დავებზე ცხადი მტკიცებულებების არსებობის შემთხვევაში, იმ დროს, როცა მოპასუხე ვალის არსებობას არ უარყოფს, სასამართლოს მიერ გადაწყვეტილების არსებითი განხილვის გარეშე გამოტანას გულისხმობს.
ამიერიდან, მოცემულ მომსახურებას სახეცვლილი ფორმით აღსრულების ეროვნული ბიურო განახორციელებს. დავები, რომლის რეგულირებასაც ამიერიდან ბიურო მოახდენს, მხოლოდ ფულადი ვალდებულების შეუსრულებლობას შეეხება.
გამარტივებული წარმოების მომსახურება მსოფლიოს მრავალ ქვეყანაშია დანერგილი და აპრობირებული. გამარტივებული, სხვაგვარად საგადახდო, წარმოების მომსახურების დანერგვაც სწორედ უცხოური (შვედური და ფრანგული მოდელი) გამოცდილების, სასამართლოს პრაქტიკისა და მთელი რიგი მოდერნიზაციების გათვალისწინებით მოხდება. რა უპირატესობა აქვს გამარტივებული წარმოების სერვისს ჩვეულებრივ სამოქალაქო დავებთან: ახალი სერვისი მხარეთა სხვაგვარ ჩართულობას უზრუნველყოფს. რესპოდენტს შეტყობინება მის წინააღმდეგ მიღებული აპლიკაციის შესახებ უშუალოდ ბარდება და პარალელულად ქეის მენეჯერი პირადად უხსნის იმ შესაძლო თანმდევ ნეგატიურ შედეგებს, რომელიც მის მიერ ვალის გადაუხდელობას შეიძლება მოყვეს.
გამარტივებული წარმოება მედიაციის ელემენტებს შეიცავს და საბოლოო გადაწყვეტილების შინაარსზე მნიშვნელოვანი გავლენის მოხდენა ორივე მხარეს შეუძლია; გამარტივებული წარმოება, იმ სახეცვლილი ფორმით, როგორითაც მის დანერგვას აღსრულების ეროვნული ბიურო აპირებს, ტიპურ დავას, ე.წ. ნულოვან-ჯამური თამაშიდან, "მოგება-მოგების" ტიპის ურთიერთობად გარდაქმნის, რადგან დავის განსაზღვრულ ეტაპზე, როდესაც მხარეები ვერ თანხმდებიან ფულადი ვალდებულების ოდენობის ან გადახდის ვადის ასპექტზე, პროცესში მედიაციის ინსტიტუტი ერთვება. შესაბამისად, მხარეებს ექმნებათ რეალური შესაძლებლობა მიაღწიონ ორმხრივად მისაღებ შედეგს.
ახალი სერვისის ამოქმედებამდე "გამარტივებული წარმოების" მუშაობის პრინციპებისა და ტექნიკის შესახებ ინფორმაციას ქართულ საბანკო და სადაზღვევო სექტორს აღსრულების ეროვნული ბიუროს სპეციალისტები მიაწვდიან. შეხვედრაზე წარმოდგენილი იქნება ყველა ის ბანკი, საფინანსო და მიკროსაფინანსო და სადაზღვევო კომპანია, რომელიც საქართველოში ოპერირებს.
