2012 წლის 23-24 აპრილს არაბთა გაერთიანებულ საემიროებში საქართველოს საელჩოს ხელშეწყობით კატარის სახელმწიფოსა და დუბაის საემიროში გაიმართება საქართველოს ბიზნეს კლიმატის პრეზენტაცია. ქართული მხრიდან ღონისძიებაში მონაწილეობენ საქართველოს ეროვნული საინვესტიციო სააგენტოს დირექტორი ქეთევან ბოჭორიშვილი, საქართველოს სავაჭრო-სამრეწველო პალატის პრეზიდენტი კახა ბაინდურაშვილი, "რაკია საქართველოს" თავისუფალი ინდუსტრიული ზონის გენერალური მენეჯერი რონი სააბი, "საქართველოს ბანკის" აღმასრულებელი დირექტორის მოადგილე ვასილ რევიშვილი, იურიდიული კომპანია "BLC"-ს დამფუძნებელი ალექსანდრე ბოლქვაძე და ბათუმის საინვესტიციო სააგენტოს წარმომადგენლები.
23 აპრილს კატარის სახელმწიფოს სავაჭრო პალატაში გაიმართება საქართველოს მიერ განხორციელებული რეფორმების და არსებული ბიზნეს კლიმატის პრეზენტაცია, რომელსაც დაესწრებიან ადგილობრივი ბიზნეს წრეების წარმომადგენლები.
24 აპრილს დუბაის საემიროში სასტუმროში "Shangri-La" გაიმართება მაშტაბური ბიზნეს ფორუმი, რომელსაც დაესწრება 150-ზე მეტი ადგილობრივი კომპანიის წარმომადგენელი. საქართველოს დელეგაციის წევრები დამსწრე საზოგადოებას გააცნობენ საქართველოში ბიზნესის განვითარების შესაძლებლობებს, ქვეყნის ტრანსფორმაციას რეგიონულ ცენტრად ტრანსპორტისა და ლოჯისტიკის კუთხით, საინვესტიციო პოტენციალსა და სავაჭრო ურთიერთობების განვითარების შესაძლებლობებს, ასევე იმ ხელსაყრელ პირობებს რასაც თავისუფალი ინდუსტრიული ზონა სთავაზობს უცხოურ კომპანიებს. ღონისძიებას ასევე დაესწრებიან საქართველოს ბიზნეს სექტორის წარმომადგენლები შემდეგი სფეროებიდან: უძრავი ქონება, სოფლის მეურნეობა, ფარმაცევტიკა და ჯანდაცვა. პრეზენტაციების შემდეგ გაიმართება ორმხრივი შეხვედრები ფორუმის მონაწილეებს შორის.
