თურქეთში დასვენება 10-15 %-ით გაძვირდა. "რია ტურიზმის" მიერ გავრცელებული ინფორმაციის თანახმად, თურქეთში სასტუმროს ჯავშნის ღირებულება 2011 წელთან შედარებით 10-15 %-ითაა გაძვირებული, რაც ინფლაციას, საწვავის, ელექტროენერგიისა და საკვები პროდუქტების გაძვირებას უკავშირდება. თუმცა გაძვირებას თურქეთის მიმართულებით ტურების დაჯავშნის რაოდენობაზე არ უმოქმედია.
ქართული ტურ-ოპერატორები კი ურთიერთგამომრიცხავ ინფორმაციას ავრცელებენ. როგორც სააგენტო "ჯი-ეიჩ-ენს" ტურისტულ კომპანია "ენ ტურში" განუცხადეს, 2011 წელთან ფასები დახლოებით 10 %-ითაა გაზრდილი, ხოლო რაც შეეხება "თრეველ ტურს", კომპანიის დამფუძნებელი სააგენტო "ჯი-ეიჩ-ენთან" საუბრისას თურქეთში დასვენების გაძვირების ფაქტს არ ადასტურებს. სიკო გეგიაძე აცხადებს, რომ თურქეთში სასტუმროების ფასები სტაბილურია და ის არ გაზრდილა. გეგიაძის განმარტებით, წელს თურქეთში რამდენიმე უმაღლესი დონის სასტუმრო გაიხსნა, რომლის ფასებიც სხვა სასტუმროებთან შედარებით მაღალია, თუმცა როგორც "თრეველ ტურის" დამფუძნებელი განმარტავს, საშუალოდ ფასები, რაც 2011 წელს თურქეთის სასტუმროებში იყო, 2012 წელსაც შენარჩუნებულია. კომპანიის ინფორმაციით, თურქეთში დასვენების ღირებულება, საუბარია 10 დღიან ტურზე - მგზავრობის ღირებულების გარეშე, წელსაც 400 დოლარიდან იწყება.
