საქართველოს სამუშაო ვიზიტით მყოფი აზიის განვითარების ბანკის (ADB) ვიცე-პრეზიდენტი ქსიაო ჟაო ფინანსთა სამინისტროში მთავრობის წევრებს შეხვდა. შეხვედრაზე ფინანსთა, რეგიონული განვითარებისა და ინფრასტრუქტურის, ენერგეტიკისა და ბუნებრივი რესურსების მინისტრებთან მიმდინარე და სამომავლო პროექტები განიხილეს.
აზიის განვითარების ბანკის ვიცე-პრეზიდენტი საქართველოსთან თანამშრომლობას წარმატებულს უწოდებს და ქვეყანაში მიმდინარე ინფრასტრუქტურის მშენებლობით კმაყოფილია.
"აზიის განვითარების ბანკი არის ერთ-ერთი უმსხვილესი ბანკი, რომელიც საქართველოს ეკონომიკის განვითარებაში მაქსიმალურადაა ჩართული. დღეისათვის ბანკმა საქართველოს 1 მლრდ დოლარამდე ასესხა. ჩვენი და საქართველოს თანამშრომლობა 2007 წელს დაიწყო და ამ ხნის განვმავლობაში ეს თანამშრომლობა ძალიან ნაყოფიერად ვითარდებოდა. ჩვენ აქტიურად ვართ ჩართულნი ტრანსპორტის სფეროში, ასევე ვახორციელებთ რამდენიმე ურბანული განვითარების პროექტს, განსაკუთრებით მნიშვნელოვანია სამოქალაქო სექტორში მიმდინარე პროექტები და მათ შორის ერთ-ერთ პროექტზე, ქობულეთის შემოვლით გზასთან მიმართერბაში, ხვალ მოვაწერთ ხელს, რაც ჩვენი აზრით ხელს შეუწყობს სტრატეგიული ფუნქციის განვითასრებას", - აღნიშნა აზიის განვითარების ბანკის ვიცე-პრეზიდენტმა.
რეგიონული განვითარებისა და ინფრასტრუქტურის მინისტრი რამაზ ნიკოლაიშვილის განმარტებით, ხვალ აზიის განვითარების ბანკის დელეგაცია ქობულეთის მშენებლობის მიმდინარეობის პროცეს მოინახულებს.
"აზიის განვითარების ბანკის ვიცე-პრეზიდენტთან საკმაოდ მნიშვნელოვანი შეხვედრა გვქონდა. საუბარი გვქონდა ყველა იმ საკითხზე, რომელიც ბანკის მიერ ნახევარი მილიარდით არის გამაგრებული. ეს არის ურბანული პროექტები თბილისსა და მცხეთაში. ასევე მნიშვნელოვანი პროექტია ქობულთის შემოვლითი გზა, რომლის მშენებლობასაც ხვალ აზიის განვითარეების ბანკის წარმომადგენლებთან ერთად მოვინახულებთ. მნიშვნელოვანი, პროექტია ასევე თბილისი-რუსთავის გზა, რომლის მშენებლობასაც ივნისში დავიწყებთ. არის კიდევ უამრავი პროექტები, რომელზედაც აზიის განვითარების ბანკთან ერთად ერთობლივად ვმუშაობთ,"- განმარტა რეგიონული განვითარებისა და ინფრასტრუქტურის მინისტრმა.
ფინანსტა მინისტრი დიმიტრი გვინდაძე განმარტავს, რომ საქართველო აზიის განვითარების ბანკთან 2007 წლიდან თანამშრომლობს და ის საქართველოს ერთ-ერთი მნიშვნელოვანი პარტნიორი საერთაშორისო საფინანსო ორგანიზაციაა.
"ეს არს სწრაფად მზარდი თანამშრომლობა საქართველოსა და აზიის განვითარების ბანკს შორის. ჩვენ ამ ბანკთან ურთიერთობა 2007 წელს დავიწყეთ და ამ ხნის განმავლობაში საკმაოდ ბევრი რამ გაკეთდა, როგორც სახელმწიფო ასევე კერძო სექტორში. 2007 წლიდან დღემდე ADB-ის მიერ საქართველოსთვის გამოყოფილია შეღავათიანი ფინანსური რესურსი 781 მლნ აშშ დოლარის ოდენობით, ძირითადად მნიშვნელოვანი ინფრასტრუქტურიული პროექტების მხარდასაჭერად. ამჟამად ADB-ის მხარდაჭერით მიმდინარე ინფრასტრუქტურული პროექტების საერთო დაფინანსება 531 მლნ აშშ დოლარს შეადგენს. საქართველოში ADB-ის ფინანსური მხარდაჭერით მიმდინარე პროექტები ხელს უწყობს ქვეყანაში ინფრასტრუქტურულ განვითარებას, რაც დაკავშირებულია მოსახლეობის დასაქმებასთან და ქვეყნის კონკურენტუნარიანობასთან"- განაცხადა ფინანსთა მინისტრმა.
ფინანსთა სამინისტროს ინფორმაციით, საქართველოს და ADB-ის შორის არსებული თანამშრომლობის პრიორიტეტული მიმართულებებია: მუნიციპალური ინფრასტრუქტურის განვითარება, ურბანული ინფრასტრუქტურის განვითარება, წყლის და წყალარინების ინფრასტრუქტურის განვითარება, საგზაო ინფრასტრუქტურის განვითარება და კერძო სექტორის მხარდაჭერა.
უახლოეს პერიოდში ADB-ის მხარდაჭერით დაგეგმილია შემდეგი მნიშვნელოვანი ურბანული პროექტების განხორციელება: თბილისი-რუსთავის ახალი ავტომაგისტრალის მშენებლობა, ანაკლიის ნაპირდაცვა, ხიდების მშენებლობა და სხვა. დაწყებულია მუშაობა, წყლის ინფრასტრუქტურის რეაბილიტაციის მიზნით ქუთაისში, ფოთში, მესტიაში, ანაკლიაში და ურეკი-შეკვეთილში. განიხილება თანამშრომლობის შესაძლებლობები ენერგეტიკის სექტორში, ჰიდროელექტრო სადგურების მშენებლობასთან დაკავშირებით. ერთ-ერთ ძირითად პრიორიტეტად რჩება აზიის განვითარების ბანკის საქმიანობა საქართველოში საბანკო და საწარმოო სექტორის დაკრედიტების კუთხით.
ვიზიტის ფორმატში დაგეგმილია დაფინანსების ახალი ხელშეკრულების ხელმოწერა, ქობულეთის შემოვლითი გზის მშენებლობლობასთან დაკავშირებით.