ზეთისხილის სადემონსტრაციო ბაღის გაშენებისთვის 250 ჰა-ზე სავარგულები მომზადდა, მოიხნა და გაფხვიერდა აქამდე უნაყოფო და გამოუყენებელი მიწები. დაირგო ნერგები, რომელთა ნაყოფიც ძირითადად მაღალხარისხიანი ზეითუნის ზეთის მისაღებად გამოიყენება. მომავალში, სოფელ ხირსაში პირველად წარმოების განვითარებასთან ერთად, ზეთის გამოსახდელი საწარმოს გახსნაც იგეგმება.

საქართველოში ზეთისხილის კულტურის პოპულარიზაციას და მისი საწარმოო მასშტაბებით მოშენებას დიდი მნიშვნელობა აქვს, რადგან ამ დარგში ათასობით ადამიანის დასაქმებაა შესაძლებელი, რაც თავისთავად ქართულ ეკონომიკაზე დადებითად აისახება.

საქართველოს რეგიონებში, კერძოდ კახეთში, იმერეთში, მარნეულსა და გურიაში ამ კულტურის დანერგვა-განვითარებისთვის შესაბამისი კლიმატი არსებობს. ზეთისხილისა და ზეითუნის ზეთის წარმოებას ჩვენს ქვეყანაში მრავალსაუკუნოვანი ტრადიციაც აქვს, რასაც დღემდე შემორჩენილი პლანტაციებიც მოწმობს. აფხაზეთსა და კახეთის მშრალ სუბტროპიკულ ზონაში ზეთისხილის კულტურა ოდითგანვე გავრცელებული იყო და ამის ისტორიული ფაქტებიც არსებობს. ზეთისხილის მოშენება 1879 წელს ახალ ათონში ბერებმა დაიწყეს, მაგრამ სამწუხაროდ მისი განვითარება ვეღარ მოხერხდა.

ზეთისხილი მარადმწვანე, სუბტროპიკული ხეხილოვანი მცენარეა, აღწევს 4-12მ სიმაღლეს და 300-400 წელზე მეტს ცოცხლობს. ცნობილია მისი 60-მდე სახეობა. ნერგი მოსავალს დარგვიდან 5-7 წლის შემდეგ იძლევა და ერთი ხიდან 15-60 კგ-ს შეადგენს. 1 ლიტრი ზეითუნის ზეთის მისაღებად 4-5კგ ნაყოფია საჭირო. ზეთისხილის ნერგი თითქმის ყველა ტიპის ნიადაგში ხარობს, მაგრამ მისი გაშენება უმჯობესია ალავიურ ნიადაგებსა და მშრალქვიან ფერდობებზე. მცენარე -7 -9 გრადუს ყინვას უძლებს. ზეთისხილის ნაყოფი ძალიან სასარგებლოა და სხვადასხვა დანიშნულებით გამოიყენება.