ღერძულა ხაზის გადაკვეთისთვის ჯარიმა ავტოავარიების პრევენციის მიზნით ორმაგდება. ამის შესახებ მთავრობის საპარლამენტო მდივანმა გია ხუროშვილმა ჟურმალისტებტან განაცხადა.
მისი თქმით, ღერძულა ხაზს ავტომანქანები ძირითადად გადაჭარბებული სიჩქარით მოძრაობისას კვეთენ.
,,მაშინ, როდესაც ერთი წლის განმავლობაში ავტოავარიების გამო დაახლოებით 2000-მდე ადამიანი არის დაზარალებული და აქედან 200 სამწუხაროდ, გარდაიცვალა, ცხადია, რომ არსებული ჯარიმები პრევენციის ფუნქციას ვერ ასრულებს. ამიტომ, ღერძულა ხაზის გადაკვეთის გამო ჯარიმის 50 ლარიდან 100 ლარამდე გაზრდის გადაწყვეტილება მივიღეთ,"- აღნიშნა ხუროშვილმა.
"ადმინისტრაციულ სამართალდარღვევათა კოდექსში" ცვლილებების თანახმად, შემხვედრი სატრანსპორტო ნაკადის გამყოფი უწყვეტი ღერძულა ხაზის გადაკვეთაისთვის დაწესებული 50 ლარიანი ჯარიმა, 100 ლარამდე იზრდება. ცვლილებებით ასევე დგინდება ახალი რეგულაცია ღერძულა ხაზის გადაკვეთაზე. კერძოდ, წელიწადში ღერძულა ხაზის მეორედ გადაკვეთისთვის, პირი უკვე 200 ლარით დაჯარიმდება.
კანონპროექტის ავტორია შინაგან საქმეთა სამინისტრო, ინიციატორი კი მთავრობა. მისი განხილვა პარლამენტს ჯერ არ დაუწყია.