6-იდან 8 აპრილამდე საგამოფენო ცენტრ "ექსპო ჯორჯიას" ტერიტორიაზე გაიხსნება მე-14 საერთაშორისო ტურისტული გამოფენა და საქმიანი ტურიზმის, შეხვედრებისა და კონფერენციების პირველი საერთაშორისო გამოფენა.
გამოფენის ორგანიზატორია გამოფენების ცენტრი "ექსპო ჯორჯია". გამოფენა ტარდება საქართველოს ტურიზმის ეროვნული ადმინისტრაციის, საქართველოს დაცული ტერიტორიების სააგენტოს, თბილისის მერიისა და USAID-ის პროექტის ეკონომიკური აღმავლობის ინიციატივის (EPI) მხარდაჭერით.
გამოფენის პარალელურად, დაგეგმილია ამ დარგის პროფესიონალთათვის სხვადასხვა ღონისძიება.
გამოფენის ოფიციალურ გახსნას დაესწრებიან: საქართველოს ეკონომიკისა და მდგრადი განვითარების მინისტრი ვერა ქობალია, თბილისის მერი გიგი უგულავა და სხვა ოფიციალური პირები.
45 საგამოფენო სტენდზე წარმოდგენილი იქნება 90 ორგანიზაცია, ტურისტული კომპანიები და დასასვენებელი კომპლექსები, ასევე ტუროპერატორები მრავალფეროვანი მომსახურეობით: კულტურული, ისტორიული და ღვინის ტურებით, ასევე ექსტრემალური და სათავგადასავლო პროგრამებით. გამოფენაზე წარმოდგენილი იქნება საქართველოს სხვადასხვა რეგიონი არსებული სანატორიუმებით, პანსიონატებით, დასასვენებელი სახლებითა და სამკურნალო-გამაჯანსაღებელი ცენტრებით.
