საქართველოს სტატისტიკის ეროვნული სამსახურისა და შვედეთის სტატისტიკის ერთობლივი პროექტის ფარგლებში საქსტატში ჩატარდა ტრენინგი სტატისტიკური კვლევების მეთოდებში. 5-კვირიანი კურსი 2011 წლის სექტემბერში დაიწყო და ორ ნაწილს მოიცავდა: პირველი ორი კვირა დაეთმო ზოგადი სტატისტიკისა და ალბათობის თეორიის საკითხებს, ხოლო მომდევნო სამი კვირა უფრო სპეციალიზებულ შერჩევის მეთოდებს მიეძღვნა. კურსის ბოლო სამუშაო კვირა მარტის თვეში შედგა. კურსის საწყისს ეტაპზე მონაწილეთა რაოდენობა დაახლოებით 20 თანამშრომელს შეადგენდა, ხოლო მომდევნო ეტაპზე კურსში 6-9 თანამშრომელი იღებდა მონაწილეობას. კურსში აქტიურად იყვნენ ჩართულები ბიზნეს სტატისტიკის და სოციალური სტატისტიკის სამმართველოების თანამშრომლები, რომელთა საქმიანობა შერჩევითი კვლევების წარმართვას უკავშირდება.
"საქსტატის" ინფორმაციით, კურსის პირველი ორი სასწავლო კვირა დაეთმო ალბათობის თეორიისა და სტატისტიკის ზოგადი კურსის გამეორებას და პრაქტიკული ამოცანების ამოხსნას. განხილული იყო ისეთი საკითხები, როგორიცაა სტატისტიკური მონაცემების დამუშავება, აღწერითი სტატისტიკის ძირითადი მაჩვენებლების დათვლა, ნდობის ინტერვალის განსაზღვრა. ამავე ეტაპზე წაკითხულ იქნა ალბათობის თეორიის შესავალი კურსიც. რომელიც მოიცავდა მათემატიკური სტატისტიკის ელემენტებსაც. მეორე კვირის ბოლოს სალექციო კურსში წარმოდენილი იქნა შესავალი სტატისტიკურ კვლევაში.
სტატისტიკური კვლევის საკითხების უფრო დეტალურ განხილვას მესამე სალექციო კვირა დაეთმო. წარმოდგენილი იყო შერჩევის მეთოდების მიმოხილვა, მარტივი შემთხვევითი შერჩევის ცნება და კვლევის შეფასებების გაანგარიშების მეთოდები აღნიშნულ საკითხებზე მუშაობა გაგრძელდა მეოთხე კვირასაც, როდესაც მონაწილეებმა მოახდინეს შესწავლილი თეორიის გამოყენება რეალურ მონაცემთა ბაზებთან მუშაობის დროს. მარტივი შემთხვევითი შერჩევის გარდა, საკმაოდ დეტალურად იყო განხილული ალბათური, ზომასთან ალბათურად პროპორციული, სტრატიფიცირებული (როგორც ერთი, ასევე მრავალსაფეხურიანიც) და კლასტერული შერჩევის მეთოდებიც.
სწავლების მეხუთე კვირის დროს განიხილებოდა კვლევითი მეთოდების სპეციალური საკითხები. განსაკუთრებული ინტერესი გამოიწვია მსმენელთა მხრიდან ისეთი საკითხების განხილვამ, როგორიცაა გამოუპასუხებლობა კვლევებში, მისი წონების განსაზღვრა და სხვ. კურსის მეხუთე კვირა აგრეთვე მოიცავდა კვლევის ადმინისტრირების საკითხებსაც. კურსის დასკვნით ეტაპზე მონაწილეებმა მოკლედ წარადგინეს თავიანთი კვლევები ნასწავლი თეორიისა და პრაქტიკის გამოყენებით და განიხილეს კვლევების სუსტი და ძლიერი მხარეები.
კურსის დასასრულს განხილული იყო სტატისტიკური ანგარიშგების სტანდარტები, რომელსაც იყენებს შვედეთის სტატისტიკა ევროსტატში სტატისტიკური ინფორმაციის წარმოდგენის დროს.
შვედი ექსპერების მიერ ჩატარებული სალექციო კურსის მასალები განთავსდა საქსტატის ვებ გვერდზე.