სალარო აპარატის ჩეკით 9 მლნ ლარის მოგების საშუალება ჩნდება. როგორც ცნობილია, სალარო აპარატის ჩეკი ლატარიის ბილეთის ფუნქციას იძენს. როგორც "ჯი-ეიჩ-ენთან" საუბრისას შემოსავლების სამსახურის უფროსმა ჯაბა ებანოიძემ განაცხადა, მთავრობამ უკვე განსაზღვრა მოგების პრემია და მისი მოცულობა 9 მლნ ლარი იქნება.
ებანოიძის განმარტებით, პრიზის მოსაგებად რაიმე გათამაშების მოწყობა არ იგეგმება, რადგანაც პრიზის მოგების საშუალებს ჩეკის მფლობელს ავტომატურად მიეცემა. მისივე განმარტებით, ჩეკი მომგებიანია თუ არა მფლობელს ავტომატურად ეცნობება.
შეგახსენებთ, რომ პარლამენტმა უკვე დაამტკიცა „ლატარიების, აზარტული და მომგებიანი თამაშობების მოწყობის შესახებ" საქართველოს კანონში ცვლილებები, რომლის მიხედვით, ჩეკის მფლობელი შემოსავლების სამსახურის მიერ ჩატარებული გათამაშების მონაწილე ხდება. აღნიშნული ინიციატივით, შემოსავლების სამსახური გაყიდული საქონლის აღრიცხვის კონტროლს განახორციელებს, რადგანაც კლიენტს უკვე ინტერესიც უჩნდება გამყიდველისაგან ჩეკი აუცილებლად მიიღოს.
