მთავრობა პაციენტს, სადაზღვევო კომპანიასა და სამედიცინო დაწესებულებას შორის ურთიერთობის ახალი თამაშის წესების შემუშავებაზე მუშაობს, რომლის პრეზენტაციასაც ჯანდაცვის მინისტრი მომავალი მთავრობის სხდომაზე გააკეთებს.
პრემიერ-მინისტრმა ახალი თამაშის წესების შესახებ ინფორმაცია დღეს ჯანდაცვის მინისტრისგან მოისმინა.
როგორც ნიკა გილაურმა აღნიშნა, მნიშვნელოვანია, რომ არსებული პრობლემები აღმოიფხვრას და პაციენტის უფლებები მაქსიმალურად იყოს დაცული.
ნიკა გილაურმა ჯანდაცვის მინისტრს თხოვა ასევე ისიც, რომ ამ წესების შემუშავებაში აქტიურად იყვნენ ჩართულები სადაზღვევო კომპანიები და სამედიცინო კლინიკები.
ჯანდაცვის მინისტრის, ზურაბ ჭიაბერაშვილის განმარტებით, ამ წესების ბაზისური ვარიანტი უკვე შემუშავებულია და პროექტი უკვე გაეგზავნა სადაზღვევო კომპანიებისა და სამედიცინო კლინიკების ხელმძღვანელებს.
ჭიაბერაშვილის თქმით, მათგან უკვე მოვიდა სხვადასხვა გვარი შენიშვნები, რომელსაც ჯანდაცვის სამინისტრო აუცილებლად ასახავს ამ წესებში. შემდგომ კიდევ ერთხელ გაივლის ამ ახალ წესებს, როგორც სადაზღვევო, ასევე სამედიცინო დაწესებულებების ხელმძღვანელებთან ერთად და ამის შემდეგ მოხდება მისი პრეზენტაცია და საზოგადოებისთვის გაცნობა.
ჭიაბერაშვილი არ მალავს, რომ ამ მიმართულებით მართლაც დიდი პრობლემებია, რადგანაც სახელმწიფო დაზღვევის პოლისის მქონე ადამიანები ხშირად შესაბამის მომსახურეობას ვერ იღებენ და წარმოიქმნება გარკვეული პრობლემები. პრობლემებია ასევე კერძო დაზღვევის მიმართულებითაც რადგან ზოგჯერ პაციენტი სამედიცინო დაწესებულებისგან შესაბამის მომსახურებას ვერ იღებს და უკმაყოფილოა.
პრემიერ-მინისტრმა ჯანდაცვის მინისტრს აღნიშნული საკითხის განხილვაში თანამშრომლობა შესთავაზა და ზურაბ ჭიაბერაშვილს დაავალა, რომ ახალი წესების პრეზენტაცია, რაც შეიძლება მალე მოახდინოს.