უამინდობამ გარკვეულწილად დააზარალა ენერგეტიკის სექტორიც. როგორც მთავრობის სხდომაზე პრემიერ მინისტრმა და ენერგეტიკისა და ბუნებრივი რესურსების მინისტრმა აღნიშნა, უამინდობის გამო ჰესების სამშენებლო სამუშაოები გაჭიანურდა. ზოგან დროებით შეჩერდა და მთაში სადაც ეხლაც კი დიდი თოვლია მშენებლობა ისევ შეჩერებულია.
ენერგეტიკის მინისტრის განმარტებით, ეს ზამთარი ენერგეტიკისათვის საკმაოდ მძიმე იყო. რადგან დიდთოვლობამ სამშენებლო სამუშაოების შეჩერება გამოიწვია.
ალექსანდრე ხეთაგურის განმარტებით, ეტაპობრივად ხდება მშენებლობების განახლება, თუმცა მთაში სადაც ისევ მაღალი თოვლია მშენებლობები დღესაც შეჩერებულია. თუმცა ენერგეტიკის მინისტრი განმარტავს რომ სამშენებლო სამუშაოები ყველგან იქ სადაც შეჩერებული იყო აპრილის მეორე ნახევრიდან აუცილებლად განახლდება.
როგორც ხეთაგური განმარტავს ამ დროისათვის მიმდინარეობს 15 ჰიდროელექტოსადგურის მშენებლობა. საუბარია ლარსი ჰესზე (20 მეგავატი), დარიალ ჰესზე (109 მგვტ), ფარავან ჰესზე (78 მგვტ), მტკვარი ჰესზე (43 მგვტ), შილდა ჰესზე (5 მგვტ), ხადორი-2 (5 მგვტ), ხელვაჩაური ჰესი (36 მგვტ), ბახვი-2 (20 მგვტ), ბახვი-3 (6 მგვტ), ლუხუმი ჰესი (12 მგვტ) და სხვა ჰესები. იმავდროულად წლის ბოლომდე დაიწყება 10 ახალი ჰესის მშენებლობა.
ხეთაგურის განმარტებით, ის ჰესები, რომელთა მშენებლობაც ამ დროისათვის მიმდინარეობს საბოლოო ჯამში 280 მეგავატს გამოიმუშავებენ.
პრემიერ-მინისტრის განმარტებით კი ახალი ჰესების მშენებლობა ახალი სამუშაო ადგილების გაჩენის წინაპირობაა და როგორც პრემიერ მინისტრმა განაცხადა ახალი ჰესების მშენებლობაზე 13 ათასი ადამიანი დასაქმდება.