რემიერ-მინისტრმა მთავრობის სხდომაზე დღეს რამდენიმე მინისტრის ანგარიში მოისმინა და მთავრობის მიერ გაცემული დაპირებების შესრულების ანგარიშს გაეცნო. ნიკა გილაურმა საზაფხულო სამუშაოებთან დაკავშირებით დეტალური ინფორმაცია მოისმინა სოფლის მეურნეობის მინისტრისგან და აღნიშნა რომ მიუხედავად იმისა, რომ უამინდობამ საგაზაფხულო სამუშაოების განხორციელებას ნაწილობრივ ხელი შეუშალა ყველაფერი მაინც ჩვეულ რეჟიმში მიმდინარეობს და მთავრობა დანაპირებს დროულად შეასრულებს.
როგორც მთავრობის სხდომაზე სოფლის მეურნეობის მინისტრმა ზაზა გოროზიამ განაცხადა, სასოფლო სამუშაოები უამინდობის გამო გაჭიანურდა, თუმცა ზოგიერთ რაიონში, სადაც ამის საშუალება იყო მოხვნითი სამუშაოები უკვე დაწყებულია.
"სასოფლო სამუშაოებმა უამინდობის გამო ოდნავ დროში გადაიწია და ამის გამო ჩვენ მასში ჩართვა გვიან მოგვიწია. მთლიანად მობილიზებულია ის ტექნიკა რომელიც სახელმწიფო საკუთრებაშია. დაწყებულია მოხვნითი სამუშაოები იმ რაიონებში სადაც მიწა მშრალი იყო, რაც შეეხება ახალ ტექნიკას, ბელორუსიიდან უკვე შემოყვანილია 120 ერთეული ტექნიკა და უკვე შემოტანილია სათესი მასალა რომლის დარიგებაც დღეიდან იწყება", - განაცხადა ზაზა გოროზიამ.
პრემიერ-მინისტრი დაინტერესდა ასევე თუ რა ეტაპზეა სოფლის მეურნეობის ცენტრების გახსნის პროგრამა. როგორც ზაზა გოროზიამ აღნიშნა, ასეთი ცენტრების გახსნა უამინდობის გამო გაჭიანურდა და ამიტომ ისინი ოფიციალურად დაახლოებით 10 დღეში გაიხსნება.
პრემიერ-მინისტრის განმარტებით, უახლოეს დღეებში გაიხსნება 12 სოფლის მეურნეობის ცენტრი და ასევე შემოვა დამატებითი ტექნიკა. საუბარია 250 ერთეულ ტექნიკაზე. სოფლის მეურნეობის მინისტრის განმარტებით კი ახალი ტექნიკის შემოყვანის პირველი ეტაპი 15 აპრილამდე დასრულდება ხოლო შემდგომ დაიწყება მეორე ეტაპი, რომელიც დაახლოებით 600 ერთეული ტექნიკის შემოყვანას ითვალისწინებს მთლიანობაში.
