"პროკრედიტ ბანკი" 2011 წლის მუშაობას დადებითად აფასებს. როგორც დღეს "პროკრედიტ ბანკი საქართველოს" მენეჯმენტის ბრიფინგზე გახდა ცნობილი, 2011 წელს გაიზარდა როგორც ბანკის კლიენტების რაოდენობა, ასევე საბანკო ოპერაციების მოცულობა, ხოლო წმინდა მოგებამ 19.7 მილიონი ლარი (11.8 მილიონი დოლარი), ამონაგებმა საკუთარ კაპიტალზე კი (ROE) 15.9% შეადგინა.
"პროკრედიტ ბანკი საქართველოს" გენერალური დირექტორის მაია მერედოვას განმარტებით, 2011 წელი "პროკრედიტ ბანკი საქართველოსთვის" მორიგი წარმატებული წელიწადი იყო. "ბანკმა შეინარჩუნა მტკიცე საბაზრო პოზიცია და კვლავაც განაგრძობდა საიმედო და სოციალური პასუხისმგებლობის მატარებელი საბანკო მომსახურების გაწევას ბიზნესებისა და ფიზიკური პირებისათვის", - აღნიშნა მერედოვამ.
აღსანიშნავია, რომ 2011 წლის ბოლოს საერთაშორისო სარეიტინგო სააგენტომ Fitch Ratings "პროკრედიტ ბანკის" რეიტინგი "BB-"-დან "BB"-მდე გააუმჯობესა, სტაბილური პერსპექტივით. ამრიგად, პროკრედიტ ბანკი კვლავ საუკეთესო და საქართველოში შესაძლო ყველაზე მაღალი რეიტინგის მფლობელია.
