უბილეთო მგზავრებისთვის საჯარიმო ქვითარის გამოწერის მექანიზმები დაკონკრეტდა. ამის შესახებ ცვლილება "ადმინისტრაციულ სამართალდარღვევათა კოდექსში" პარლამენტმა დღეს დაამტკიცა.
მოქმედი კანონმდებლობით, საჯარიმო ქვითრის გამოწერის მექანიზმები არ იყო განსაზღვრული. პარლამენტის მიერ დღეს მიღებული გადაწყვეტილებით კი დაკონკრეტდა, რომ საჯარიმო ქვითარი ბურთულიანი კალმით ან/და ელექტრონული ფორმით უნდა გამოიწეროს.
ასეთი ვალდებულება შესაბამის პირებს იმ მგზავრების მიმართ ექნებათ, რომლებიც ავტობუსით ან მიკროავტობუსით უბილეთოდ მგზავრობენ, ასევე, იმ მგზავრთა მიმართ, რომელთაც აღნიშნული ტრანსპორტით ათიდან თექვსმეტ წლამდე ბავშვები უბილეთოდ გადაჰყავთ.
გარდა ამისა, ბურთულიანი კალმით ან ელექტრონული ფორმით უნდა გამოუწერონ ჯარიმები იმ პირებსაც, რომლებიც ადგილობრივ საქალაქო რეგულარულ სამგზავრო გადაყვანას სანებართვო პირობების დარღვევით, ან შესაბამისი ნებართვის გარეშე ახორციელებენ. ახალი რეგულაცია ეხებათ იმ მძღოლებსაც, რომლებიც დადგენილი მოძრაობის მარშრუტს დაარღვევენ.
