როგორც ცნობილია თბილისის მერია ბავშვთა ქალაქ „მზიურის" მიმდებარედ 35652 კვ.მ მიწის ნაკვეთს ყიდის, სადაც შემდგომ სავაჭრო და გასართობი ცენტრები მოეწყობა. ობიექტის საწყისი ღირებულება 3,5 მლნ. დოლარია და მის გასხვისებას დედაქალაქის მთავრობა პირდაპირი მიყიდვის ფორმით გეგმავს.

საპრივატიზებო პირობების თანახმად, მყიდველი ვალდებულია შემოთავაზებული საპრივატიზებო საფასურის არანაკლებ 50%-ი, პრეზიდენტთან შეთანხმებიდან ერთი თვის ვადაში დაფაროს, ხოლო დარჩენილი თანხის დაფარვა ხელშეკრულების გაფორმებიდან 9 თვეშია სავალდებულო.

ინვესტორი ვალდებულია, აღნიშნულ ტერიტორიაზე სავაჭრო და გასართობი-გამაჯანსაღებელი ცენტრი და მასთან დაკავშირებული საზოგადოებრივი დანიშნულების ობიექტები ააშენოს. ინვესტორი ვალდებულია ასევე ინფრასტრუქტურის მშენებლობისათვის 3,5 წლის ვადაში, არანაკლებ 20 მილიონი აშშ დოლარის ინვესტიცია განახორციელოს.

„საპრივატიზებო პირობებად განსაზღვრული საინვესტიციო ვალდებულებების შესრულების უზრუნველყოფის მიზნით, ნასყიდობის ხელშეკრულების საქართველოს პრეზიდენტთან შეთანხმებიდან 1 თვის ვადაში, არანაკლებ 1 მილიონი აშშ დოლარის ოდენობის უპირობო და გამოუხმობი საბანკო გარანტიის წარმოდგენა, რომლის ვადაც არანაკლებ 2 თვით უნდა აღემატებოდეს საინვესტიციო ვალდებულების შესრულების ვადას"- ნათქვამია საპრივატიზაციო პირობებში.

აღსანიშნავია, რომ მიწის შეძენის მსურველებს შესაბამისი დოკუმენტაციის დოკუმენტაციის წარდგენა თბილისის მერიის სსიპ - ქონების მართვის სააგენტოში 20 მარტის ჩათვლით შეუძლიათ.