საქართველოში წარმოებული სოფლის მეურნეობის პროდუქციის მიწოდება მის სამრეწველო გადამუშავებამდე (სასაქონლო კოდის შეცვლამდე) დღგ-ისგან თავისუფლდება. დღგ-სგან თავისუფლდება ასევე ქვეყანაში წარმოებული მსხვილფეხა რქოსანი პირუტყვის, ღორის, ცხვრის და თხის ახალი ან გაციებული ხორცის მიწოდება. აღნიშნულის შესახებ ცვლილება „საგადასახადო კოდექსში" შედის.
როგორც სააგენტო „ჯი-ეიჩ-ენთან" საუბრისას, ფინანსთა მინისტრის მოადგილემ რუსუდან კემულარიამ განაცხადა, კოდექსში შესატანი ცვლილებები, რომელიც უშუალოდ სოფლის მეურნეობის დარგს ეხება, ხელს შეუწყობს საქართველოში წარმოებული სოფლის მეურნეობის პროდუქციის წარმოების განვითარებას და მისი კონკურენტუნარიანობის ამაღლებას, იმპორტირებულ პროდუქციასთან შედარებით.
„საგადასახადო კოდექსში" შესატანი ცვლილებების მიზანია სოფლის მეურნეობის პროდუქციაზე არამხოლოდ პირველადი, არამედ შემდგომი მიწოდება, საწარმოო გადამუშავებამდე, გათავისუფლდეს დღგ-ისგან, ჩათვლის უფლებით. ანუ დღეს მოქმედ კანონმდებლობაში გვაქვს დღგ-ისგან განთავისუფლება ჩათვლის უფლების გარეშე, მხოლოდ პირველად მიწოდებაზე"- აღნიშნა რუსუდან კემულარიამ.
მინისტრის მოადგილე აცხადებს, რომ მიზანი ამ ცვლილებისა საკმაოდ მნიშვნელოვანია, რადგანაც მოხდება დარგის წახალისება და შესაბამისად პროდუქციის გათავისუფლება დღგ-სგან მიმართულია იმისკენ, რომ დარგში აქტიობა გაიზარდოს.
დღგ-სგან განთავისუფლების შემდეგ, თუ რა თანხა დარჩება წარმოებაში რუსუდან კემულარია ვერ აკონკრეტებს, თუმც განმარტავს, რომ სახელმწიფო ბიუჯეტში შემოსავლების კუთხით კლება იქნება, მაგრამ ეს თანხა ეკონომიკაში მაინც დარჩება.
„ამის განსაზღვრა საკმაოდ რთულია, თუმც საშემოსავლო ნაწილში კლება იქნება, მაგრამ ეს არ იქნება დრამატული. თანხა. თავის მხრივ ეს თანხა ისევ ეკონომიკაში რჩება და ამიტომაც მნიშვნელოვანი ცვლილებაა. რაც თავის მხრივ დაეხმარება ბიზნესმენს მეტი საშუალება ქონდეს საკუთარი წარმოების გაფართოებისთვის. თუმც ეს უკვე ინდივიდუალურია და ცალკეულ მეწარმესა თუ ბიზნესმენზეა დამოკიდებული"- აცხადებს რუსუდან კემულარია.
