პრემიერ-მინისტრმა ნიკოლოზ გილაურმა მთავრობის სხდომაზე ათწლიანი სახაზინო ფასიანი ქაღალდების გამოშვებაზე ისაუბრა. მთავრობის თავმჯდომარის განმარტებით, პირველად საქართველოს ისტორიაში ქვეყანამ ათწლიანი სახაზინო ფასიანი ქაღალდები გამოუშვა, რომელიც ლარშია ნომინირებული.
პრემიერ-მინისტრის განმარტებით, ევრობონდები დოლარშია ნომინირებული, ხოლო 10-წლიანი სახაზინო ფასიანი ქაღალდები - მხოლოდ ლარში.
"საკმაოდ წარმატებული ტრანზაქცია იყო. სულ გამოშვებულია 10 მილიონი ლარის ათწლიანი ფასიანი ქაღალდი. რეალურად კი მოთხოვნა სამჯერ მაღალი იყო და მისი საპროცენტო განაკვეთი 12 პროცენტზე დაფიქსირდა", - განაცხადა გილაურმა.
პრემიერ-მინისტრის განმარტებით, დღემდე ფინანსთა სამინისტროს მიერ გამოშვებული იყო 1-წლიანი, 2-წლიანი და 5-წლიანი ფასიანი ქაღალდები. როგორც გილაური განმარტავს, ფინანსთა სამინისტროს მიერ გამოცემული ფასიანი ქაღალდების საპროცენტო განაკვეთი ყოველდღიურად მცირდება, რაც ეკონომიკის მიმართ დიდ ნდობას ნიშნავს.
შეგახსენებთ, რომ 7 მარტს ფინანსთა სამინისტროს სახაზინო ობლიგაციების აუქციონზე გაიყიდა 5 000 000 ლარის ნომინალური ღირებულების 10-წლიანი ვადიანობის ფასიანი ქაღალდები. აუქციონში მონაწილეობა მიიღო ექვსმა კომერციულმა ბანკმა. მოთხოვნამ შეადგინა 13 700 000 ლარი. მინიმალური საპროცენტო განაკვეთი 12.200 პროცენტით, მაქსიმალური 12.410 პროცენტით, ხოლო საშუალო შეწონილი - 12.305 პროცენტით განისაზღვრა. კუპონურმა განაკვეთმა 12.3 პროცენტი შეადგინა. კუპონის გადახდა მოხდება წელიწადში ორჯერ, ყოველ ექვს თვეში.
