შიდა აუდიტთან დაკავშირებული საკითხების განმხილველი საბჭოსა და გერმანიის საერთაშორისო თანამშრომლობის საზოგადოება GIZ-თან გაფორმებული შეთანხმების ფარგლებში, გერმანიის ეკონომიკური თანამშრომლობის და განვითარების სამინისტროს (BMZ) ეგიდით სასწავლო ტური გერმანიაში მოეწყო, რომლის მიზანიც გერმანიაში დანერგილი შიდა აუდიტის სისტემის გაცნობა და გამოცდილების გაზიარება იყო.
დელეგაციას ფინანსთა მინისტრის მოადგილე რუსუდან კემულარია ხელმძღვანელობდა და მის შემადგენლობაში იყვნენ ეკონომიკისა და მდგრადი განვითარების, შრომის, ჯანმრთელობისა და სოციალური დაცვის, საგარეო საქმეთა, კულტურისა და ძეგლთა დაცვის სამინისტროების შიდა აუდიტის სუბიექტის უფროსები, კონტროლის პალატის წარმომადგენლები, ასევე საბჭოს სამდივნოს ხელმძღვანელი ნინო ელიაშვილი და მისი წევრები.
გერმანიაში ვიზიტისას, დელეგაცია გაეცნო გერმანიის საჯარო სექტორის დარგობრივი სამინისტროების გამოცდილებას. შეხვედრები გაიმართა გერმანიის ფედერაციული რესპუბლიკის შინაგან საქმეთა, საგარეო საქმეთა სამინისტროების, ჰესენის ფედერალური მიწის იუსტიციის, ინტეგრაციისა და ევროპის საკითხების სამინისტროების, ჰესენის ფედერალური მიწის კანცელარიის შიდა აუდიტის სუბიექტის უფროსებთან.
ფინანსთა სამინისტროს ინფორმაციით, საინტერესო შეხვედრა მოეწყო გერმანიის შიდა აუდიტის ინსტიტუტთან (DIIR Deutsches Institut für Interne Revision). ინსტიტუტის ხელმძღვანელობამ ქართულ მხარეს გააცნო გერმანიაში ინსტიტუტის მიზნები და მოქმედების სფეროები. DIIR ახორციელებს საჯარო და კერძო სექტორის შიდა აუდიტორების მომზადება/გადამზადებას მთელი ქვეყნის მასშტაბით ასევე, ამზადებს მეთოდოლოგიურ დოკუმენტებს, რომლებიც შესაბამისობაშია საერთაშორისო სტანდარტებთან. აღსანიშნავია, რომ DIIR-ის ინსტიტუტი თანამშრომლობს ამერიკის შიდა აუდიტის ინსტიტუტთან (IIA-Institute of Internal Auditors) შიდა აუდიტორების სერთიფიცირების, გამოცდების მომზადების, სემინარების ჩატარების კუთხით. შესაბამისად, გააჩნია როგორც ეროვნული სერთიფიცირების, ასევე IIA-ს სერთიფიცირების პროგრამები. ამგვარი პროგრამების არსებობა აძლიერებს შიდა აუდიტის ინსტიტუტს და სამომავლოდ, IIA-ს საქართველოს წარმომადგენლობის დახმარებით, ის საქართველოშიც დაინერგება.
გარდა ამისა, ქართულ მხარემ შეხვედრები გამართა გერმანიის საერთაშორისო თანამშრომლობის საზოგადოება GIZ-ში. საქართველოსთან დაკავშირებული საკითხების მენეჯერმა ტობიას ნივიანდამ გააკეთა პრეზენტაცია თუ რა მიმართულებით უწევს დახმარებას ორგანიზაცია საქართველოს და როგორია GIZ-ის სამომავლო გეგმები.
სამინისტროში განმარტავენ, რომ მნიშვნელოვანი შეხვედრა გაიმართა უმსხვილეს სააქციო საზოგადოება „ფრაპორტში", რომლის აქციების 50%-ზე მეტი სახელმწიფო მფლობელობაშია. სს „ფრაპორტის" შიდა აუდიტის სუბიექტი წელიწადში დაახლოებით 60 შიდა აუდიტორულ შემოწმებას ატარებს მსოფლიოს უდიდეს აეროპორტებში (რომელთა სრული ან ნაწილობრივ განკარგვის უფლებაც აქვს). „ფრაპორტიში" გამართული შეხვედრების ერთ-ერთი მთავარი ამოცანა იყო საჯარო სექტორის შიდა აუდიტისა და კერძო სექტორის შიდა აუდიტის განსხვავებების და საერთო მხარეების განსაზღვრა, რადგან ქართული კანონმდებლობა მომავალში ითვალისწინებს ქვეყანაში შიდა აუდიტის სუბიექტების შექმნას სწორედ ასეთი ტიპის ორგანიზაციებში.
აღსანიშნავია, რომ 2012 წლის განმავლობაში შიდა აუდიტთან დაკავშირებული საკითხების განმხილველი საბჭო გეგმავს მეთოდოლოგიური და პრაქტიკული სახელმძღვანელოს შეიმუშავებას, ფინანსური მართვისა და კონტროლის სისტემის ჩამოყალიბების ხელშწყობასა და შიდა აუდიტორების დატრეინინგებას, რომელიც სწორედ GIZ-თან თანამშრომლობის ფარგლებში 2012 წლის მაისიდან დაიწყება.
