,,ქართული პროდუქციის პოპულარიზაციის მიზნით, მეღვინეებთან და ,,ასოციაცია ქართულ ღვინოსთან" შეთანხმებით, სოფლის მეურნეობის სამინისტრომ გადაწყვიტა მონაწილეობა მიიღოს მსოფლიოს ყველაზე დიდ და პრესტიჟულ გამოფენებში. ეს საშუალებას მისცემს ქართულ კომპანიებს მსოფლიო ბაზარზე წარადგინონ საკუთარი პროდუქცია და მოიძიონ ახალი საექსპორტო ბაზრები. დუსელდორფის გამოფენაზე ქართველმა მწარმოებლებმა შეხვედრები გამართეს მსოფლიოს უდიდეს სადისტრიბუციო კომპანიებთან და გარკვეულ შეთანხმებებსაც მიაღწიეს. ეს ყველაფერი, ქართული ღვინის ინდუსტრიის განვითარებას ნამდვილად წაადგება," - განაცხადა სოფლის მეურნეობის მინისტრმა ზაზა გოროზიამ.

საქართველო აღნიშნულ გამოფენაში ყოველწლიურად მონაწილეობს. მსოფლიოს სხვადასხვა ქვეყნების გვერდით, წელს ქართული სტენდზე ღვინისა და ალკოჰოლური სასმელების მწარმოებელი ადგილობრივი კომპანიების ,,თბილღვინოს", ,,ჩელთის", ,,კორპორაცია ქინძმარაულის", ,,ბადაგონი 1882", ,,კორპორაცია ქართული ღვინის", ,,კახური ტრადიციული მეღვინეობის", ,,შუხმანის", ,,მეღვინეობა ხარებას", ,,სარაჯიშვილის" და სხვა კომპანიების პროდუქცია იყო წარმოდგენილი. 3 დღის განმავლობაში, ქართული პავილიონი ღვინის ექსპერტებს, ტრეიდერებს, დეგუსტატორებს, ჟურნალისტებს და უამრავ დამთვალიერებელს მასპინძლობდა. გაიმართა ქართული ღვინის დეგუსტაციაც, რომელსაც ღვინის ჟურნალისტი და დეგუსტატორი ტომას ბრანდლი ხელმძღვანელობდა.

,,Prowein"-ი ერთ-ერთი ყველაზე მნიშვნელოვანი და უდიდესი გამოფენაა მსოფლიოში, რომელშიც საქართველო მე-12 წელია მონაწილეობს. ამჯერად 16 ქართული ღვინის კომპანიაა წარმოდგენილი, რაც ამ წლების მანძილზე ყველაზე დიდი მაჩვენებელია. ქართულმა ღვინომ ძალიან დიდი ინტერესი გამოიწვია ამ გამოფენაზე. ქართულ სტენდზე ჩატარებული დეგუსტაციის დროს დამთვალიერებელთა საოცარი აქტივობა იყო. იმედი მაქვს, რომ ქართული ღვინის უძველესი კულტურა და ტრადიციები ხელს შეუწყობს მომავალში მის პოპულარიზაციას, " - განაცხადა ტომას ბრანდლიმ.

გამოფენის ფარგლებში, სადეგუსტაციო კონკურსი გაიმართა, რომელშიც მონაწილე 8 ქართული კომპანიიდან, ხუთი კომპანიის ,,შატო მუხრანის", ,,ჩელთის", ,,კორპორაცია ქართული ღვინის", ,,კორპორაცია ქინძმარაულის" და ,,მეღვინეობა ხარებას" პროდუქციამ ვარსკვლავები დაიმსახურეს.

გამოფენის მიმდინარეობისას ქართული საღამოც გაიმართა, რომელშიც ,,ქართული ხმები" მონაწილეობდნენ. მოწვეულ სტუმრებს ქართული ღვინის, ყველის და ქართული ტრადიციული ტკბილეულის დაგემოვნების საშუალება ჰქონდათ.

,,Prowein 2012" ძალიან წარმატებული აღმოჩნდა ქართული კომპანიებისთვის, რადგან 5-მა კომპანიამ 2 ვარსკვლავი მიიღო. ეს იმის მაჩვენებელია, რომ ჩვენი ღვინო ძალიან ხარისხიანია და ექსპერტების აღიარებას იმსახურებს. გამოფენის ფარგლებში გამართულ ქართული საღამოზე 11 ქვეყნის 150 ექსპერტი მოვიწვიეთ, რომლებმაც ჩვენი ღვინო დააგემოვნეს და დადებითი შეფასებაც მისცეს. ეს აღიარება დაეხმარება ქართულ ღვინოს საექსპორტო არეალის გაზრდასა და პოპულარიზაციაში," - განაცხადა მინისტრის მოადგილემ ია ჯანაშიამ.

,,Prowein"-ი მსოფლიოში ღვინისა და ალკოჰოლური სასმელების ერთერთი ყველაზე დიდი გამოფენაა, რომლის ვიზიტორთა რიცხვი ყოველწლიურად იზრდება. წელს, გამოფენას 45 ქვეყნიდან 3600 მონაწილესთან ერთად, 400 000-მდე სტუმარი ეწვია.