საქართველოს საგარეო საქმეთა მინისტრის მოადგილის, ნინო კალანდაძის განცხადებით, განმუხურში მომხდარ ფაქტთან დაკავშირებით პასუხისმგებლობა საოკუპაციო ჯარებს ეკისრებათ. როგორც კალანდაძემ დღეს გამართულ ტრადიციულ ბრიფინგზე განაცხადა, ქართულ მხარეს მსგავსი ინციდენტების პრევენციის შესაძლებლობა არ აქვს, რადგან ადგილზე ვითარებას ვერ აკონტროლებს.
"ერთადერთი, რაც შეგვიძლია ის არის, რომ ამის თაობაზე მაქსიმალურად დროულად და საჯაროდ განვაცხადოთ და საერთაშორისო თანამეგობრობის ყურადღება მივიქციოთ, რაც ჩვენ დაუყოვნებლივ გავაკეთეთ", - განაცხადა მინისტრის მოადგილემ.
მისივე თქმით, აღნიშნულ ფაქტთან დაკავშირებით, საგარეო საქმეთა სამინისტრო საპროტესტო ნოტას ამზადებს.
"მოვუწოდებთ საოკუპაციო ძალებს, დაიცვან ადამიანის უფლებები და მიიღონ უსაფრთხოების ზომები, რადგან მომხდარზე პასუხისმგებლები ისინი არიან", - აღნიშნა კალანდაძემ.
შეგახსენებთ, რომ 4 მარტს, 3 საათზე და 20 წუთზე რუსეთის მიერ ოკუპირებული აფხაზეთის ტერიტორიიდან გადმოსულმა დაახლოებით ექვსმა უცნობმა შეიარაღებულმა პირმა ცეცხლი გახსნა ქართული პოლიციის საგუშაგოს მიმართულებით სოფელ განმუხურთან. ამის შესახებ ინფორმაციას საქართველოს შინაგან საქმეთა სამინისტრო ავრცელებს.
შსს-ს ინფორმაციით, თავდასხმის დროს გამოყენებული იქნა ავტომატური იარაღი და "რპგ 7"-ის ტიპის ორი ყუმბარმტყორცნი. სროლამ დაახლოებით ათი წუთი გასტანა. სროლის შედეგად არავინ დაშავებულა. თავდამსხმელები მიიმალნენ ოკუპირებული აფხაზეთის ტერიტორიაზე.
საქართველოს შინაგან საქმეთა სამინისტრო გმობს აღნიშნულ ქმედებას და მოუწოდებს რუსეთის საოკუპაციო ძალას აღკვეთოს და თავი შეიკავოს შეიარაღებული პროვოკაციებისგან.
