აჭარის ბიუჯეტი 29,4 %-იანი გადაჭარბებით შესრულდა. როგორც სააგენტო "ჯი-ეიჩ-ენს" აჭარის ფინანსთა და ეკონომიკის სამინისტროში განუცხადეს, ბიუჯეტის გეგმა იანვარ-თებერვალში 15 მლნ. 321 ათას 200 ლარი იყო, თუმცა გეგმა 129,4 %-ით შესრულდა, რადგანაც 2012 წლის ორ თვეში აჭარის ბიუჯეტში 19 მლნ.818 ათას 300 ლარის აკუმულირება მოხდა.
სტატისტიკური ინფორმაციის თანახმად, იანვარ-თებერვლის აჭარის ბიუჯეტის გადასახადების მუხლი 133,5 %-ითაა შესრულებული, სხვა შემოსავლების მუხლი კი 194,7 %-ით. სამაგიეროდ, გარღვევაა არაფინანსური აქტივების მუხლში, რადგანაც გეგმა მხოლოდ 31 %-ითაა შესრულებული.
რაც შეეხება მუნიციპალურ ერთეულებს, იანვარ-თებერვალში ვერ მოხერხდა ბათუმის ბიუჯეტის შესრულება. აჭარის ფინანსთა და ეკონომიკის სამინისტროს ინფორმაციით, 2012 წლის ორი თვის მონაცემებით ბათუმის ბიუჯეტი მხოლოდ 93,1 %-ითაა შესრულებული.
როგორც სააგენტო "ჯი-ეიჩ-ენს" ბათუმის მერიაში განუცხადეს, ბიუჯეტის შეფასება ხდება კვარტლურად, თუმცა ორი თვის შეუსრულებლობა პირობითად დონორების მიერ გამოყოფილი თანხას უკავშირდება, რომელიც გეგმის მიხედვით უნდა შემოსულიყო, თუმცა აღნიშნული თანხა ბიუჯეტში მოგვიანებით აისახება.
სამაგიეროდ სერიოზული ზრდაა სხვა მუნიციპალური ერთეულების ბიუჯეტებში. კერძოდ, ხელვაჩაურის ბიუჯეტი 359,9 %-ითაა შესრულებული, ხულოს ბიუჯეტი - 320,9 %-ით, შუახევის ბიუჯეტი - 274,6-ით, ქედას ბიუჯეტი - 212,5-ით, ხოლო ქობულეთის ბიუჯეტი 188,3-ითაა შესრულებული.
