18 იანვარს თბილისის ოპერისა და ბალეტის სახელმწიფო თეატრის წინ გაიხსნება გამოჩენილი ქართველი მომღერლის ცისანა ტატიშვილის ვარსკვლავი. ვარსკვლავის გახსნამდე კონსერვატორიის დიდ დარბაზში გაიმართება ამ მოვლენისადმი მიძღვნილი ცერემონიალი _ შედგება რეჟისორ სალომე კობახიძის ფილმის "ცისანას" პრეზენტაცია და გაიმართება საზეიმო კონცერტი ოპერის სოლისტების, ქალბატონ ცისანას სტუდენტების, ოპერის თეატრის გუნდისა და ორკესტრის მონაწილეობით (დირიჟორი _ რევაზ ტაკიძე).
ცისანა ტატიშვილი არის საქართველოსა და საბჭოთა კავშირის სახალხო არტისტი, შოთა რუსთაველის და ზაქარია ფალიაშვილის პრემიების ლაურეატი, ჰუმანიტარული აკადემიის აკადემიკოსი, საქართველოს ღირსების ორდენოსანი, შვეიცერის მედლის მფლობელი.
ცისანა ტატიშვილის მდიდარი რეპერტუარი მოიცავს ისეთ საოპერო პარტიებს, როგორებიცაა აიდა, ამნერისი, ლეონორა, ამელია, დეზდემონა, ებოლი, სანტუცა, რენატა, ტოსკა, ორტრუდა, სალომეა, ტატიანა, ლიზა, ეთერი, მარო და სხვა, აგრეთვე სოპრანოს პარტიებს ბეთჰოვენის მე-9 სიმფონიაში, ვერდის რეკვიემსა და პერგოლეზის შტაბატ Mატერ-ში.
ცისანა ტატიშვილი ხშირად მღეროდა გერმანიის, ინგლისის, იტალიის, ესპანეთის, პორტუგალიის, ავსტრიის, შვედეთის, საფრანგეთის, ჩეხეთის, პოლონეთის, ბულგარეთის, საბერძნეთის და საბჭოთა კავშირის სხვადასხვა ქალაქების საოპერო თეატრებში. მის შემოქმედებას მუდამ აღმატებულ შეფასებებს აძლევდა ქართული თუ Uუცხოური პრესა.
მისი ჩანაწერები გამოიცა ვენაში, მოსკოვსა და თბილისში.
ქალბატონი ცისანა ეწევა პედაგოგიურ მოღვაწეობას თბილისის სახელმწიფო კონსერვატორიაში, არის აკადემიური სიმღერის ფაკულტეტის პროფესორი.
