საქართველო დიდი ხანია ერთი ადამიანის თეატრად იქცა, - ამის შესახებ საპარლამენტო უმცირესობის ლიდერმა გიორგი თარგამაძემ დღეს, პარლამენტში გამართულ პოლიტიკურ დებატებზე განაცხადა.
მისი თქმით, პოლიტიკური სივრცის მონოპოლია არის „ნაციონალური მოძრაობის" საფირმო ნიშანი, რომლის საუკეთესო ბერკეტად გადაიქცა „მოქალაქეთა პოლიტიკური გაერთიანების შესახებ" კანონი, რომელიც ახალი ცვლილებებით ხელისუფლებას უტოვებს შესაძლებლობას ლეგალურად შეინარჩუნოს მონოპოლია პოლიტიკაში და იმავდროულად სურვილისამებრ აკონტროლოს და თუ საჭიროა შეზღუდოს არასამთავრობო სექტორი.
„ფაქტია, რომ დემოკრატია თქვენთვის გავლენისა და ძალაუფლების შენარჩუნებაზე ნაკლებად პრიორიტეტულია", - აღნიშნა თარგამაძემ.
უმცირესობის ლიდერმა პრეზიდენტს ასევე ჰილარი კლინტონის სიტყვები შეახახსენა.
„მინდა შეგახსენოთ ჰილარი კლინტონის სიტყვები, რომელიც მან რამდენიმე აფრიკელი ლიდერის მისამართით ბრძანა: „ძალიან ბევრი აფრიკაში ჯერ კიდევ ცხოვრობს იმ ადამიანების მმართველობის პირობებში, რომლებიც მეტისმეტად ზრუნავენ თავიანთი ხელისუფლების გახანგრძლივებაზე და ძალიან ცოტას ფიქრობენ იმ მემკვიდრეობაზე, რომელიც თავისი ქვეყნის მომავლისთვის უნდა შექმნან", - განაცხადა თარგამაძემ.
