ბათუმის საკრებულოს „ქრისტიან-დემოკრატი" წევრი ნაზი ქობულაძე უპოვართათვის უფასო თავშესაფრის გამოყოფას მოითხოვს. მისი განცხადებით, იმ კატეგორიის ადამიანებისთვის, ვისაც ზამთარში წასასვლელი არსად აქვთ, ქალაქში არ არსებობს არც ერთი თავშესაფარი, ადგილი, სადაც უპოვარი და უსახლკარო ადამიანები შეძლებდნენ ღამის გათევას და სადილის მიღებას.
ბათუმში არსებული ერთადერთი მსგავსი ტიპის დაწესებულება "წმინდა ანასა და წმინდა ფრანჩესკას სახელობის თავშესაფარი" ადგილობრივი ხელისუფლების გადაწყვეტილებით შარშან გაუქმდა და დაპირების მიუხედავად, ალტერნატიული ობიექტი ჯერაც არ გახსნილა.
„ჩვენს ქალაქში ბევრი ადამიანი საჭიროებს ასეთ თავშესაფარს, მით უმეტეს ყველას კარგად გვახსოვს, რომ გასულ ზამთარს ბათუმში ერთი ადამიანი უსახლკარობის გამო ყინვისგან გარდაიცვალა. „ქრისტიან-დემოკრატები" ვითხოვთ ქალაქის მერიისგან გამოინახოს მსგავსი ადგილი, სადაც სიცივეში უსახლკაროდ დარჩენილი ადამიანები თავის შეფარებას შეძლებენ" - განაცხადა ნაზი ქობულაძემ.
