რუმინეთის ორგანიზებული დანაშაულისა და ტერორიზმის გამოძიების სამმართველოს (DIICOT-ის) პროკურორებმა რუმინეთის პრეზიდენტობის ყოფილი კანდიდატი კალინ ჯორჯესკუ დააკავეს. ინფორმაციას ამის შესახებ რუმინული მედია ავრცელებს.
ჯორჯესკუ საკუთარ სახლში, ილფოვის ოლქის ქალაქ მოგოშოაიაში გადაიყვანეს, სადაც გამომძიებლები ჩხრეკას ატარებენ. პარალელურად ჩხრეკა კიდევ ოთხ მისამართზე მიმდინარეობს - ბუქარესტში, მოგოშოაიაში, ჩიოპლანში და ბუფტეაში.
DIICOT-ის განცხადებით, გამოძიება ორგანიზებული დანაშაულებრივი ჯგუფის შექმნისა და განსაკუთრებით მძიმე შედეგებით, განმეორებით ჩადენილი თაღლითობის საქმეზე მიმდინარეობს. გამოძიების ფარგლებში სამი პირია გამოვლენილი - ორი რუმინეთისა და ერთი იტალიის მოქალაქე.
გამომძიებლების ინფორმაციით, საქმე ეხება 1.1 მილიონ ევროზე მეტ ზარალს.
პროკურორების მიერ გავრცელებული ინფორმაციის თანახმად, ერთ-ერთი დაზარალებული დაარწმუნეს, რომ საბანკო დაწესებულებისგან 6 მილიონი ევროს ოდენობის დაფინანსებას მიიღებდა, თუ შესაბამის გარანტიას წარადგენდა. ამის შემდეგ დაზარალებულმა 1 მილიონ ევროზე მეტი თანხა გადარიცხა. მოგვიანებით, ეჭვმიტანილებმა მას უთხრეს, რომ დამატებითი გარანტიის წარდგენის შემთხვევაში, დაფინანსების თანხა შესაძლოა, 15 მილიონ ევრომდე გაზრდილიყო. ამის შემდეგ დაზარალებულმა დამატებით 100 ათასი ევრო გადარიცხა.
რუმინული მედიის ცნობით, საქმეზე გამოძიება უფრო ადრე, ბიზნესმენის მიერ შეტანილი საჩივრის საფუძველზე დაიწყო. 2025 წლის სექტემბერში DIICOT-მა დაადასტურა ორგანიზებული დანაშაულებრივი ჯგუფის შექმნისა და თაღლითობის ფაქტზე სისხლის სამართლის საქმის არსებობა. იმ დროისთვის გამოძიება მიმდინარეობდა ისე, რომ არც ერთ პირს ეჭვმიტანილის სტატუსი არ ჰქონდა.
ჯორჯესკუსა და საქმეში სხვა ფიგურანტებს DIICOT-ის ცენტრალურ ოფისში დაკითხვაზე გადაიყვანენ.
