ფრაქცია "ერთობა სამართლიანობის" თავმჯდომარის დიმიტრი ლორთქიფანიძის განცხადებით, საპარლამენტო უმცირესობა მხოლოდ იმიტომ შეინარჩუნეს, რომ პრეზიდენტ მიხეილ სააკაშვილის პარლამენტში გამოსვლის დროს მისი ფრაქციის აქტივობა ჩაკარგულიყო. ამის შესახებ ლორთქიფანიძემ ბიუროს სხდომაზე მას შემდეგ განაცხადა, რაც დებატებში დროის გაზრდასთან დაკავშირებით უარი მიიღო.
"იმ შემთხვევაში, თუ მოგვცემთ 30-წუთიან დროს დებატებზე გამოსასვლელად, პირობას ვდებთ, რომ ამ დროს პლენარულ სხდომებზე აღარ გამოვიყენებთ. წინააღმდეგ შემთხვევაში, მივიჩნევთ, რომ უმცირესობის შენარჩუნების ხელოვნური მეთოდი მიმართული იყო იქითკენ, რომ საათი და 35 წუთი დაჰპირისპირებოდა 15 წუთს და ფრაქციის აქტივობა ჩაკარგულიყო", - განაცხადა ლორთქიფანიძემ.
დეპუტატის გამოსვლას საპარლამენტო უმრავლესობის ერთ-ერთი ლიდერი, პირველი ვიცე-სპიკერი მიხეილ მაჭავარიანი გამოეხმაურა და ლორთქიფანიძის მისამართით განაცხადა: "თუ ასე ფიქრობთ, ეგ თქვენი პრობლემაა".
პარლამენტის თავმჯდომარის დავით ბაქრაძის თქმით, თუ ლორთქიფანიძე დროის გამოყოფის საკითხთან დაკავშირებით ასეთ შეფასებას გააკეთებს, ეს მისი უფლებაა.
"ჩვენი მიზანი იყო, დებატებში მონაწილეობა ოპოზიციას რაც შეიძლება ფართოდ მიეღო, თუმცა მეტის დროის დამატების საშუალებას რეგლამენტი აღარ მაძლევს", - მიმართა ბაქრაძემ ოპოზიციონერ დეპუტატს.
