უკრაინის პრეზიდენტის, ვოლოდიმირ ზელენსკის განცხადებით, რუსეთმა ბოლო ორი კვირის განმავლობაში კიევსა და კიევის ოლქზე 100-ზე მეტი ბალისტიკური რაკეტით მიიტანა იერიში.
„ყველა ხედავს და ესმის, რომ ამჟამად რუსული ბალისტიკური რაკეტებისგან თავის დაცვა გვიჭირს. განსაკუთრებით კი, Patriot-ის სისტემებისთვის განკუთვნილი რაკეტები არ გვყოფნის. მხოლოდ ოქტომბერში, 14 ოქტომბრიდან მოყოლებული, რუსეთმა უკვე რამდენჯერმე განახორციელა ბალისტიკური სარაკეტო შეტევა.
ფაქტობრივად, ორ კვირაში კიევსა და კიევის ოლქზე 100-ზე მეტი ბალისტიკური რაკეტა გაუშვეს. ყველაფერს ვაკეთებთ, რომ დავიცვათ ჩვენი ენერგეტიკული სისტემა, ინფრასტრუქტურა და ლოგისტიკა. ეს ძალიან რთული ამოცანაა“, - განაცხადა ზელენსკიმ.
უკრაინის პრეზიდენტის თქმით, ქვეყანა ყველაფერს აკეთებს, რათა მხარდაჭერის ახალი პაკეტების მიღება უზრუნველყოს.
„ნოემბერში სამმხრივ შეხვედრას ველოდებით, რომელშიც უკრაინის, აშშ-ისა და რუსეთის წარმომადგენლები მიიღებენ მონაწილეობას. მნიშვნელოვანია, რომ ევროპაც მონაწილეობდეს ყველა დიპლომატიურ ინიციატივაში.
უკრაინა ყოველთვის მოითხოვს, რომ ევროპა მოლაპარაკებებში და გადაწყვეტილებების მიღების პროცესში იყოს ჩართული“, - აღნიშნა ზელენსკიმ.
