ხვალ, 21 თებერვალს, მთავრობა ელექტროენერგის ვაუჩერების დარიგებას იწყებს. 20 ლარიან ელექტროენერგიის ვაუჩერს საქართველოში 1,2 მლნ-ზე მეტი ოჯახი მიიღებს. როგორც დღეს სახელმწიფო კანცელარიაში გამართულ ბრიფინგზე პრემიერ-მინისტრმა ნიკა გილაურმა განაცხადა, პროგრამის ბიუჯეტი 25 მლნ. ლარია და თანხა მთავრობის სარეზერვო ფონდებიდან გამოიყოფა.
„მოგეხსენებათ წელს საქართველოში საკმაოდ ცივი ზამთარია, რამაც ჩვენს მოსახლეობას ბევრი პრობლემა შეუქმნა. მთავრობა ყველაფერს აკეთებს იმისათვის, რომ ეს პრობლემები მინიმალურ პერიოდში აღმოიფხვრას, საუბარი მაქვს გზებზე და ელექტროენერგიაზე. მკაცრი ზამთრის პირობებში ელექტროენერგიის ხარჯები გაიზარდა. პრეზიდენტის დავალებით ჩვენ შევიმუშავებთ ელექტროენერგიის ვაუჩერის პროგრამა, რომლის დარიგებაც ამ კვირაშივე დაიწყება. ეს არის 20 ლარიანი ვაუჩერი, რომელსაც ყველა ოჯახი მიიღებს. მთავრობამ ანალოგიური პროგრამა გასულ წელსაც განახორციელა და ვაუჩერს 1,2 მილიონ ოჯახზე მეტი მიიღებს"- განაცხადა პრემიერ-მინისტრმა ნიკა გილაურმა
გილაურის განცხადებით, პროგრამის განხორციელებაზე პასუხისმგებელი ჯანდაცვის სამინისტროა.
ჯანდაცვის მინისტრის ანდრია ურუშაძის განმარტებით, იმუშავებს ცხელი ხაზი და რაიმე პრობლემის შემთხვევაში მოქალაქეებს საშუალება მიეცემათ დაუკავშირდნენ სოციალური უზრუნველყოფის სააგენტოს. მინისტრის თქმით, ვაუჩერების დარიგება მაქსიმალურად შემჭიდროებულ ვადებში მოხდება, რაც თავის მხრივ მეტეოროლოგიურ პირობებზე იქნება დამოკიდებული. მოსახლეობა ვაუჩერებს ტრადიციისამებრ ბინაზე მიიღებს.
„პრეზიდენტის დავალების საფუძველზე უკვე შემუშავებულია ელექტროენერგიის ვაუჩერების პროგრამა. 20 ლარიანი ვაუჩერი გადაეცემა ყველა ოჯახს და მათ ტრადიციისამებრ ექნებათ საშუალება, რომ სურვილისამებრ სხვას დაეხმარონ. გვექნება ასევე კომუნიკაციის რამდენიმე არხი, მათ შორის ცხელი ხაზი და ვეცდებით მოქალაქეებს ოპერატიულად მოვემსახუროთ"- აღნიშნა ანდრია ურუშაძემ.
