საქართველოს საგარეო საქმეთა სამინისტრო გამოხატავს ღრმა მწუხარებას 2012 წლის 20 იანვარს ნიგერიის ქალაქ კანოში მომხდარ აფეთქებებთან დაკავშირებით, რომელსაც მოყვა მრავალრიცხოვანი მსხვერპლი და ნგრევა. ამის შესახებ თავად საგარეო უწყების განცხადებაშია ნათქვამი.
განცხადების თანახმად, საქართველო სოლიდარობას უცხადებს ნიგერიის მთავრობას, ხალხს და მხარს უჭერს ქვეყანაში სტაბილურობის განმტკიცებისკენ მიმართულ ნიგერიის ხელისუფლების ძალისხმევას.
"ამასთანავე, საქართველო მკაცრად გმობს ტერორიზმის ნებისმიერ გამოვლინებას და უერთდება საერთაშორისო თანამეგობრობის მოწოდებას, რათა მართლმსაჯულებას გადაეცეს ბარბაროსული ტერორისტული აქტების ყველა მონაწილე და თავდამსხმელი", - აღნიშნავენ საგარეო საქმეთა სამინისტროში.
საგარეო საქმეთა სამინისტრო თანაგრძნობას უცხადებს ნიგერიის მთავრობას და ნიგერიელ ხალხს, დაღუპულთა ოჯახებს და ახლობლებს.
