საინვესტიციო ფონდმა "Hermitage Capital"-მა 100-გვერდიანი ანგარიში გამოაქვეყნა, სახელწოდებით "მაგნიტსკის წამება და მკვლელობა". ანგარიშში არის დოკუმენტაცია, რომელიც მოწმობს იმას, რომ გარდაცვალების წინ იურისტს ფიზიკურად გაუსწორდნენ.
ანგარიშის 34-ე გვერდზე გამოქვეყნებულია სასჯელაღსრულების ფედერალური სამსახურის თანამშრომელთა ანგარიშების ქსეროასლები, რომლებიც მოწმობს, რომ 2009 წლის 16 ნოემბერს ანუ მისი სიკვდილის დღეს სერგეი მაგნიტსკის წინააღმდეგ ხელბორკილები და რეზინის ჯოხები გამოიყენეს. ორივე ანგარიში წინასწარი დაკავების იზოლატორის ცნობილი "მატროსსკაია ტიშინას" ხელმძღვანელის, პოლკოვნიკ ფიკრეტ ტაგიევის მიერაა ხელმოწერილი, მათზე ასევე არის იზოლატორის სხვა მაღალჩინოსნების ო. კუზნეცოვის, პ. ბოროვკოვისა და ა. ლარინის ხელმოწერები.
ამ დოკუმენტებიდან ცხადი ხდება, რომ 2009 წლის 16 ნოემბერს, როდესაც მაგნიტსკი "ბუტირკიდან" ჰოსპიტალიზაციისთვის "მატროსსკაია ტიშინაში" გადაიყვანეს, იზოლატორის ხელმძღვანელობამ გადაწყვიტა, მისთვის გაეკეთებინათ ხელბორკილები და მის წინააღმდეგ რეზინის ხელკეტი გამოეყენებინათ. 19:30 საათზე გაკეთებული ხელბორკილები, ანგარიშის მიხედვით, 20:00 საათზე მოხსნეს. ამავე დღეს სერგეი მაგნიტსკი იზოლატორში გარდაიცვალა.
უფლებების დამცველების თქმით, მაგნიტსკის გარდაცვალების საქმეში ასევე არის "სასწრაფო დახმარების" ექიმების ჩვენებები, რომლებიც ასევე მოწმობენ იმას, რომ მაგნიტსკი სასტიკად იყო ნაცემი.
37 წლის სერგეი მაგნიტსკი, რომელიც გადასახადების გადაუხდელობის სქემის მოფიქრებისთვის იყო დაპატიმრებული, იზოლატორ "მატროსსკაია ტიშინაში" 2009 წლის 16 ნოემბერს გარდაიცვალა. მაშინ გაჟღერებული ოფიციალური ვერსიის მიხედვით, გარდაცვალების მიზეზად გულის მწვავე უკმარისობა დასახელდა. რუსეთის ფედერაციის საგამოძიებო კომიტეტი ირწმუნება, რომ მაგნიტსკის გარდაცვალება მისთვის სამედიცინო დახმარების არადროულად აღმოჩენამ გამოიწვია.
"ჰოსპიტალიზაციის ნაცვლად მაგნიტსკის ათავსებენ ერთადგილიან კამერაში, სადაც მასთან ერთად სპეციალური საშულებებებით შეიარაღებული დაცვის რვა წევრი იმყოფება. ისინი მას ხელბორკილებით საწოლზე აბამენ და რეზინის ხელკეტით სცემენ", _ აცხადებენ ანგარიშის ავტორები.
აღნიშნული ანგარიში რუსეთის პრეზიდენტთან არსებული ადამიანის უფლებების დაცვის საბჭოს, აშშ-სა და კანადის პარლამენტს და ასევე ევროკავშირის ქვეყნებს გაეგზავნათ.