თუ მსოფლიო დაუბრუნდა ცივი ომის დროს არსებულ მდგომარეობას ეს რუსეთის წისქვილზე წყალს ნამდვილად არ დაასხამს. ამის შესახებ „ჯი-ეიჩ-ენს" ექსპერტმა საერთაშორისო საკითხებში ნიკა ჩიტაძემ განუცხადა. მისი თქმით, რუსეთის მხრიდან განცხადებები ისკანდერების განთავსებასთან დაკავშირებით უფრო ძალის დემონსტრირებას გავს.
„თუ გამალებული შეიარაღება წავიდა რუსეთის ეკონომიკა საგრძნობლად დაზარალდება, ისევე როგორც საბჭოთა კავშირი დაზარალდა ცივი ომის დროს სწორედ ამ გამალებული შეიარაღების გამო. მიუხედავად ამერიკაში არსებული ეკონომიკური კრიზისისა, აშშ-ს ეკონომიკა 13-ჯერ აღემატება რუსეთის ეკონომიკურ პოტენციალს. ამერიკის მშპ 13 ტრილიონ ამერიკულ დოლარს შეადგენს, რუსეთისა კი 1 ტრილიონია. ამ პირობებში რუსეთს გაუჭირდება გარკვეული წინააღმდეგობის გაწევა. რუსეთის მხრიდან განცხადებები ისკანდერების განთავსებასთან დაკავშირებით უფრო ძალის დემონსტრირებას გავს. რუსეთს ასევე სჭირდება ხისტი განცხადებები მედვედევის მხრიდან პოლიტიკური ვაჭრობისთვის, რათა იქნებ ამ განცხადებებმა დასავლეთი აიძულოს, რომ რაღაც დათმობებზე წავიდეს რუსეთთან მიმართებაში. კიდევ ერთი ფაქტორია, რომ რუსეთს სჭირდება არსებობდეს მტრის ხატი დასავლეთის სახით, რადგან რუსეთში დღევანდელი ხელისუფლების რეიტინგი ეცემა", - განაცხადა ჩიტაძემ „ჯი-ეიჩ-ენთან" საუბრისას.
მისი თქმით, ამერიკული რაკეტსაწინააღმდეგო სისტემები ეს გახლავთ თავდაცვითი სისტემები და ის რუსეთისკენ არაა მიმართული.
„რაც შეეხება ამ რაკეტსაწინააღმდეგო სისტემებს. მე მინდა გითხრათ, რომ ამერიკული რაკეტსაწინააღმდეგო სისტემები ეს გახლავთ თავდაცვითი სისტემები. მათ განთავსებას ამერიკა ცდილობს აღმოსავლეთ ევროპაში და ასევე შესაძლებელია მათი განთავსება ხმელთაშუა ზღვასა და შავი ზღვის აკვატორიაში მოძრავ ხომალდებზე. ეს არის თავდაცვითი და ის არანაირად არ არის მიმართული რუსეთის მიმართულებით. რაც შეეხება თვითონ რუსეთს. რუსეთის გაღიზიანება გამოიწვია იმან, რომ შეერთებულმა შტატებმა განაცხადა, რომ აღარ მიაწვდის ინფორმაციას რუსეთს ამ სისტემების შესახებ. თუმცა, მანამდე როგორც შეერთებული შტატები, ასევე ნატო სთავაზობდა თანამშრომლობას რუსეთს. მეტსაც გეტყვით. იგივე ნატო-ს ახალ სტრატეგიულ კონცეფციაში წერია, რომ ნატო რუსეთს განიხილავს როგორც პარტნიორს. ამ შემთხვევაში ნატო სთავაზობს რუსეთს, რომ შემუშავებულ იქნას ერთობლივი რაკეტსაწინააღმდეგო სისტემა", - განაცხადა ჩიტაძემ.
მისი განმარტებით, შეერთებულმა შტატებმა ინფორმაციის მიწოდებაზე რუსეთ-ირანის თანამშრომლობის გამო შეიკავა თავი.
„ამერიკამ იმიტომ გადაწყვიტა არ მიაწოდოს ინფორმაცია რუსეთს, რომ ბოლო დროს ნათელი გახდა, რომ რუსეთი მხარდაჭერას უცხადებდა ირანს ბირთვული პროგრამის შემუშავებაში. ის მოხსენებ , რომელიც გააკეთა ატომური ენერგიის საერთაშორისო სააგენტომ ირანის ბურთვულ პროგრამასთან დაკავშირებით, რუსეთი და ჩინეთი ანხორციელებდნენ ზეწოლას სააგენტოზე, რათა ეს მასალა არ ყოფილიყო გამოქვეყნებული, რადგან რუსეთს აწყობს ირანთან თანამშრომლობა, ისევე როგორც ჩინეთს. ჩინეთი თავის ნავთობზე მოთხოვნების დაახლოებით 15 %-ს იკმაყოფილებს ირანიდან იმპორტული ნავთობის ხარჯზე. ერთის მხრივ რუსეთი ირანისთვის შეიარაღების ერთ-ერთი მთავარი მიმწოდებელია. მეორე მხრივ რუსეთს აწყობს დაძაბულობა ირანის გარშემო, რადგან ეს ხელს უწყობს ნავთობზე ფასების ზრდას. მესამე ფაქტორია ის, რომ რუსეთი თანამშრომლობს ირანთან ბუშერის ელექტროსადგურის ერთობლივ ექსპლუატაციის სფეროში. რუსეთ-ირანს შორის თანამშრომლობას ამ ელექტროსადგურთან დაკავშირებით ხელი ჯერ კიდევ 1995 წელს მოეწერა და რუსეთი არც მალავს, რომ მას აქვს ირანთან საგზაო თანამშრომლობის რუკა. ამიტომ, ბუნებრივია, რომ ამერიკამ რუსეთ-ირანის თანამშრომლობის გამო უარი განაცხადა ინფორმაციის მიწოდებაზე. რუსეთს ასევე სურს ძალის დემონსტრირება აჩვენოს, თითქოს ის განათავსებს ისკანდერებს, დაუმიზნებს ამ რაკეტსაწინააღმდეგო სისტემებს და მზადყოფნაში მოიყვანს ბირთვულ და სარაკეტო ძალებს რუსეთის დასავლეთ ნაწილში. რეალურად რუსეთი უფრო კუნთებს ათამაშებს", - აღნიშნა ექსპერტმა.
მისი თქმით, ამ დროისთვის არ არის საუბარი იმაზე, რომ რუსეთ-ამერიკას შორის რაიმე ტიპის სამხედრო დაპირისპირება დაიწყება. თუმცა ამბობს, რომ ამ საკითხთან დაკავშირებით მოიმატებს.
შეგახსენებთ, რომ რუსეთი აღშფოთებას გამოთქვამს ნატო-სა და აშშ-ს გეგმასთან დაკავშირებით, რომელიც ევროპაში რაკეტსაწინააღმდეგო სისტემების განთავსებას უკავშირდება.
