საქართველოს პრეზიდენტის მიხეილ სააკაშვილის განცხადებით, თუშეთში კლდეების აფეთქებას აპირებენ, რომ იქ უკეთესი გზით შევიდნენ და ეს სამუშაოები მომავალი წლის ბოლომდე იქნება მიყვანილი. ამის შესახებ სააკაშვილმა წინანდალში ყოფნისას განაცხადა.
„ჩვენ შევძლებთ ძალიან დიდი ტურისტული პოტენციალის ამუშავებას. აქ არის წარმოუდგენლად კარგი მშრალი კლიმატი, წარმოუდგენლად კარგი ბუნება, წარმოუდგენლად კარგი საკვები, წარმოუდგენელი ცივილიზაცია, კულტურა. ჩვენ აღვადგინეთ გრემი, ნეკრესი, შუა მთაში ჩავატარეთ სამუშაოები, ალავერდში ჩავატარეთ სამუშაოები, გომბორის გზა, რომელიც თავისთავად ძალიან კარგია, იმიტომ, რომ მართლა ამოკლებს აქაურობას და თუშეთში ვაპირებთ რაღაც კლდეების აფეთქებას, რომ შევიდეთ უკეთესი გზით და ეს სამუშაოები მომავალი წლის ბოლომდე იქნება მიყვანილი", - აღნიშნა პრეზიდენტმა.
თუშეთთან დამაკშირებელი ერთადერთი სამანქანო გზა ამჟამად მდინარე სტორის ხეობაში გადის, აბანოს უღელტეხილის გავლით. გზა თოვლის გამო ოქტომბრის ბოლოს იკეტება და მაისის შუა რიცხვებამდე არ იხსნება. 6 თვის განმავლობაში თუშეთში დარჩენილი რამდენიმე ოჯახი რაიონულ ცენტრში, ახმეტაში ჩასვლას მხოლოდ მესაზღვრეების ვერტმფრენით ახერხებს, რომელიც თვეში ერთხელ დაფრინავს.
