თბილისში, რიყეზე რონალდ რეიგანის ქანდაკება დადგეს. ცივი ომისა და საბჭოური ეპოქის დასასრულის სიმბოლოს ძეგლი რიყის პარკში 23 ნოემბერს გაიხსნება.
აშშ-ის მე-40 პრეზიდენტის ბრინჯაოს ქანდაკება ავთანდილ მონასელიძემ შექმნა.
"თავისუფლების შენარჩუნება ყოველი თაობის საზრუნავი უნდა იყოს", - რონალდ რეიგანის ეს სიტყვები მონუმენტზე ქართულად და ინგლისურადაა ამოტვიფრული.
ამერიკის შეერთებული შტატების პრეზიდენტის ქანდაკებასთან მსურველებს ფოტოს გადაღებაც შეეძლებათ. ამისათვის პრეზიდენტის გვერდით, სკამზე სპეციალური ადგილია გამოყოფილი.
დედაქალაქში ანტისაბჭოური პრეზიდენტის ძეგლის გახსნა საბჭოთა კავშირის დაშლის 20 წლისთავს უკავშირდება.
