საფრანგეთის პოლიციამ დღეს ყოფილი საბჭოთა კავშირის მოქალაქეებისგან შემდგარი ორგანიზებული დანაშაულებრივი ჯგუფი დააკავა, რომლებსაც ქვეყნის სამხრეთ-დასავლეთ ნაწილში ქურდული ბანდა ჰქონდათ ორგანიზებული. ბანდაში 23 კაცი შედიოდა. ისინი საქართველოს, რუსეთისა და სომხეთის მოქალაქეები არიან. ინფორმაციას ამის შესახებ ქალაქ ბორდოს პროკურატურა ავრცელებს.
"ოპერაცია ქვეყნის სამხრეთ ნაწილში და რამდენიმე რაიონში ერთდროულად მიმდინარეობდა. სულ მასში 300 ჟანდარმი იღებდა მონაწილეობას . "ოპერაცია წარმატებით დასრულდა", _ აცხადებენ საფრანგეთის შს სამინისტროში.
გამოძიების ინფორმაციით, დაკავებულები ძარცავდნენ და აყაჩაღებდნენ კერძო სახლებს, მაღაზიებსა და საწყობებს ერთი წლის განმავლობაში, იპარავდნენ ციფრულ ტექნიკასა და ძვირფასეულობას. შემდეგ ყოველივე ამას ისინი ბელგიაში ან კავკასიაში აგზავნიდნენ.
