თავისუფალი უნივერსიტეტის სამეთვალყურეო საბჭოს თავმჯდომარე კახა ბენდუქიძე ევროპას აკრიტიკებს
როგორც ბენდუქიძემ დღეს "ეკონომისტის" კონფერენციაზე სიტყვით გამოსვლისას განაცხადა მას არ მოსწონს ბიუროკურატიული ევროპა.
"დღეს გავიგე, რომ საქართველოში ჩამოდის სიიმ კალასი და ჩემთვის გაუგებარია რა რეფრომები უნდა იყოს განხილული, მაშინ როდესაც ჩვენ ევროპასთან ღია ცის პოლიტიკა გვაქვს. როგორც ჩანს, ევროპა სიტყვა რეფორმას უკვე ბრჭყალებში ხმარობს. ფსიქოლოგიურად და პოლიტიკურად ჩვენ ვართ ევროპის ნაწილი. იმ ევროპის, რომელიც პატივს სცემს ადამიანის უფლებებს კაპიტალის ბრუნვის პრინციპებს, მაგრამ არსებობს კიდევ სხვა ევროპა, რომელიც არის ბიუროკრატიული არსება და რომელშიც განსაზღვრულია როგორი უნდა იყოს საგადასახადო განაკვეთი როგორი ფორმა უნდა ჰქონდეს კიტრს და მე სულაც არ მინდა ასეთი ევროპა. ასეთი ევროპა აგონიაშია. მე არ მინდა ევროპა სადაც პატარა საბერძნეთის პრობლემა წარმოშობს ამხელა კრიზისს ევროპაში", - განაცხადა ბენდუქიძემ.
როგორც ბენდუქიძემ განმარტა, მას სურს რომ საქართველო იყოს იმ ევროპის ნაწილი, სადაც პატივს სცემენ ადამიანის უფლებებს, კულტურას და ა.შ. და არა იმ სისულელეებს, რასაც ამ პერიოდში ევროპაში აქვს ადგილი. როგორც ბედუქიძემ განმარტა, ახლა ევროპაში მნიშვნელოვანი კვირაა და სწორედ ამ დღეებში წყდება გაღრმავდება თუ არა კრიზისი. როგორც მან განმარტა, თუ კრიზისი გაღრმავდა ეს თავისთავად დაეტყობა საქართველოს ეკონომიკასაც.
შეგახსენებთ, რომ დღეს, 17 ნოემბერს, ორდღიანი ოფიციალური ვიზიტით, საქართველოს ევროკომისიის ვიცე-პრეზიდენტი, ევროკომისარი ტრანსპორტის საკითხებში სიიმ კალასი ეწვევა. სიიმ კალასი შეხვედრას გამართავს პრემიერ-მინისტრ ნიკა გილაურთან და ეკონომიკის მინისტრ ვერა ქობალიასთან. შეხვედრების მთავარი თემა საქართველოში ტრანსპორტის სფეროს რეფორმები იქნება.