აჭარაში MICE ტურიზმი ვითარდება. აჭარის ტურიზმის დეპარტამენტის ინფორმაციით, გასულ კვირას ბათუმი არაერთ საინტერესო კონფერენციას მასპინძლობდა. მსგავსი ღონისძიებების ბათუმში ჩატარებამ ხშირი ხასიათი მიიღო, რაც რეგიონში MICE ტურიზმის განვითარებას უწყობს ხელს.
11 ნოემბერს რეგიონში მოღვაწე კარდიოლოგებმა ონლაინრეჟიმში ბრიტანელ პროფესორ პულტერთან კონფერენცია გამართეს. კონფერენციის თემა იყო "არტერიული წნევის პარამეტრების კონტროლი და სიკვდილიანობის შემცირება". მასში 41 ქვეყნის კარდიოლოგები მონაწილეობდნენ, მათ შორის 25 ბათუმელი მედიკოსი.
12 ნოემბერს სასტუმრო "რადისონში" გაიმართა კონფერენცია თამაზე: "მწვავე რესპირატორული დაავადებების პრევენცია და ვირუსული ინფექციების წინააღმდეგ ბრძოლის გზები". სამეცნიერო კონფერენციაზე იმ პრეპარატების პრეზენტაცია მოხდა, რომელსაც ქართული ფარმაცევტული კომპანიები აწარმოებენ და რომლებიც მედიკოსებს მწვავე რესპირატორული დაავადებების დასამარცხებლად ყველაზე ეფექტურად მიაჩნიათ. ფორუმს საქართველოს რესპირატორული დაავადებების ასოციაციის პრეზიდენტი და სხვადასხვა სამედიცინო დაწესებულებების წამყვანი სპეციალისტები ესწრებოდნენ.
კიდევ ერთი კონფერენცია გაიმართა 13 ნოემბერს სასტუმრო "შერატონში", სიმსივნის პრევენციის მსოფლიო კოალიციის ეგიდით. კონფერენციის მიზანი იყო სიმსივნური დაავადებების გამომწვევი მიზეზების შესახებ საზოგადოების ინფორმირება. კოალიციის რეგიონულმა დირექტორმა დავით ნანობაშვილმა დარბაზში შეკრებილებს ინფორმაცია მიაწოდა იმ პროდუქციის შესახებ, რომელსაც ნებისმიერი ქართული ოჯახი ყოველდღიურად იყენებს და რომელთა შემადგენლობაში არსებული ქიმიური ნივთიერებები იწვევენ აღნიშნულ დაავადებებს.
მსოფლიო სიმსივნის პრევენციის კოალიციასთან ერთად შეხვედრის ინიციატორები ევროპისა და იტალიის საბუნებისმეტყველო მეცნიერებათა აკადემიები იყვნენ.
