"ქართუ" ბანკთან დაკავშირებით ბიზნესომბუდსმენი ინფორმაციას მხოლოდ პრესიდან და ტელევიზიიდან ფლობს. "პროცედურულად თუ რაიმე პრობლემა აქვთ მათ უნდა მოგვმართონ, უნდა გავიაროთ ამ პრობლემასთან დაკავშირებული დოკუმენტები და შემდეგ შეიძლება რაიმეს თქმა. ინფორმაცია მაქვს პრესიდან, აქამდე ჩვენთვის არავის არ მოუმართავს", - განაცხადა გიორგი პერტაიამ დღეს პარლამენტში ჟურნალისტებთან საუბრისას.
რაც შეეხება პარლამენტის მიერ მიღებულ კანონს, რომელსაც ~ქართუ~ არ ეთანხმება, ბიზნესომბუდსმენმა განაცხადა, რომ ამ თემასთან დაკავშირებით ძალიან მნიშვნელოვანია საერთაშორისო პრაქტიკის ნახვა.
"ძალიან ბევრ წარმატებულ ქვეყანაში ასეთი პრაქტიკა არსებობს. თუ ვინმე ამას არ ეთანხმება და წინააღმდეგია, შეუძლია პარლამენტს გაუგზავნოს ან ჩვენ მოგვმართოს. ჩვენ შეგვიძლია ამაზე ვიმუშაოთ. თუ საბანკო სფეროში ამის პრობლემაა ამაზე ვიმუშავებთ, მაგრამ ერთი კონკრეტული ბიზნესმენის ლობირებაზე, ან კონკრეტული ბიზნესის დაცვაზე ორიენტირებული არა ვართ, თავად სფეროში თუ არის პრობლემა, ვეცდებით დავეხმაროთ," - აღნიშნა გიორგი პერტაიამ.
შეგახსენებთ, რომ ბანკი "ქართუს" განცხადების მიხედვით, ა.წ. 7 ნოემბრიდან უკვე მოქმედებაშია შესული "სააღსრულებო წარმოებათა შესახებ" საქართველოს კანონის 823-ე მუხლი.
"აღნიშნული ცვლილება სერიოზული დარტყმის ქვეშ აყენებს საქართველოს საბანკო სისტემას, ლახავს მისი, ასევე მთლიანად ქართული სახელმწიფოს საერთაშორისო იმიჯს, რამდენადაც შექმნილ საკანონმდებლო გარემოში ბანკი, როგორც პირველი რიგის იპოთეკარი, ფაქტობრივად აღარ წარმოადგენს უზრუნველყოფილ კრედიტორს და თუ იპოთეკის რეგისტრაციის შემდეგ აღმოჩნდება, რომ საგადასახადო გირავნობა/იპოთეკის წარმოშობის საფუძვლები არსებობდა ბანკის იპოთეკის რეგისტრაციამდე (თუმცა მოგვიანებით გამოვლინდა), მაშინ პირველ რიგში დაკმაყოფილდება საგადასახადო გირავნობა/იპოთეკით უზრუნველყოფილი მოთხოვნა და მხოლოდ შემდეგ (თუ რამე დარჩა) ბანკის მოთხოვნა, რაც უგულებელყოფს საჯარო რეესტრის ჩანაწერების სისწორის პრეზუმფციას და ფაქტობრივად უარყოფს იპოთეკის არსსა თუ საყოველთაოდ აღიარებულ ფუნდამენტურ პრინციპებს", - ნათქვამია "ქართუს" განცხადებაში.
