საპარლამენტო ფრაქცია "ქრისტიან-დემოკრატების" წევრი მაგდა ანიკაშვილი პენსიონერების ასაკობრივ ჯგუფებად დაყოფას ეწინააღმდეგება. დღეს, ბიუჯეტის პროექტის განხილვისას, მაგდა ანიკაშვილმა განაცხადა, რომ "ქრისტიან-დემოკრატები" 2012 წლის ბიუჯეტის მხარს არ დაუჭერენ, რადგან ასაკობრივი ზღვარი 67 წელი ჩაიდო.
ანიკაშვილის შეფასებით, გაუგებარია, რა მოტივაცია ამოძრავებს მთავრობას, როდესაც პენსიონერების დაყოფა ხდება ასაკობრივი ჯგუფის მიხედვით.
"ქალბატონები 60 წლის ასაკიდან გადიან პენსიაზე, მამაკაცები - 65 წლის ასაკიდან. ქალებს 7 წელიწადს მოუწევთ გაზრდილი პენსიის ლოდინი, მამაკაცებს - 2 წელიწადს. თქვენ გაათანაბრეთ ქალისა და მამაკაცის საპენსიო ასაკი", - მიმართა ანიკაშვილმა ფინანსთა მინისტრს.
ოპოზიციონერმა დეპუტატმა სოციალურ და ჯანდაცვის სისტემის არაეფექტურობაზე და რეფერალურ პროგრამასთან დაკავშირებულ პრობლემებზედაც გაამახვილა ყურადღება.
"გვიმტკიცებთ, რომ ეს რეფერალური პროგრამა არსებობს, მაგრამ როგორი შუამდგომლობაც არ უნდა გავუწიოთ ადამიანებს, ამ პროგრამასთან დაკავშირებით სერიოზული პრობლემებია", - განაცხადა ანიკაშვილმა.
მან დასძინა, რომ ჯანდაცვაში რომელი პროგრამა რა თანხით ფინანსდება, გაუგებარია.