ცქრილა ღვინის მწარმოებელი კომპანია "ბაგრატიონი 1882"-ის გაყიდვები წელს 12 %-ით გაიზარდა. როგორც სააგენტო "ჯი-ეიჩ-ენს" კომპანიაში განუცხადეს, "ბაგრატიონი 1882" წელს რამდენიმე ახალ ბაზრებზე გავიდა და მენეჯმენტი აქტიურად მუშაობს საექსპორტო ბაზრებზე, და აქტიურად ცდილობს არსებულ მიმწოდებლებთან ერთად ახალი მიმწოდებლები მოიზიდოს და გაყიდვების არეალი კიდევ უფრო გააფართოვოს. კომპანიაში განმარტავენ, რომ 2011 წელს კომპანია აზერბაიჯანის ბაზარზე გავიდა, სადაც წლის ბოლომდე 10 ათასი ბოთლი ცქრიალა ღვინის რეალიზაციას გეგმავს.
წლის ბოლომდე 10 ათასი ბოთლი "ბაგრატიონის" რეალიზაციაა დაგეგმილი ნიგერიაშიც, სადაც კომპანიამ გაყიდვები ცოტა ხნის უკან დაიწყო.
სტატისტიკური ინფორმაციის მიხედვით, "ბაგრატიონი 1882"მა 2011 წლის 1-ელი სექტემბრიდან 1-ელ ნოემბრამდე ადგილობრივ ბაზარზე 589 ათასი ბოთლი "ბაგრატიონი" გაყიდა, ხოლო 2010 წლის ანალოგიურ პერიოდში 592 ათასი ბოთლი.
რაც შეეხება ექსპორტს, 2011 წლის 1-ელი იანვრიდან 1-ელი ოქტომბრის ჩათვლით გაყიდულია 233 ათას 200 ბოთლი ცქრიალა ღვინო, მაშინ როდესაც კომპანიამ გასული წლის ანალოგიურ პერიოდში საექსპორტო ბაზრებზე 138 ათასი 634 ბოთლი "ბაგრატიონი" გაყიდა.
2011 წელს "ბაგრატიონ 1882"-ის პროდუქცია გაიყიდა უკრაინაში, აშშ-ში, დიდ ბრიტნეთში, ლატვიაში, ნიგერიაში, თურქეთში, ნიდერლანდებში, შვედეთში, ტაივანში და სხვა. თუმცა როგორც კომპანიის მენეჯმენტი განმარტავს, მათი მთავარი საექსპორტო ბაზარი მაინც უკრაინაა, სადაც "ბაგრატიონი 1882"-ის გაყიდვების 70 %-ი მოდის.
ს.ს. ბაგრატიონი 1882 ცქრიალა ღვინის მწარმოებელი პირველი სპეციალიზებული საწარმოა საქართველოში. საწარმო 1937 წელს დაარსდა. დღესდღეობით კომპანია საქართველოს ცქრილა ღვინის ბაზრის ლიდერია.
კომპანიის სახელწოდება ქართველ მეფეთა შთამომავლის, თავად ივანე ბაგრატიონ-მუხრანელის სახელს უკავშირდება, რომელმაც XIX საუკუნის შუა ხანებში ქართული ცქრიალა ღვინის წარმოება ფრანგული ბოთლური მეთოდით დაიწყო. სწორედ აქედან იღებს დასაბამს ქართული ცქრიალა ღვინის საუკუნოვანი ისტორია. მსოფლიო აღიარება ამ პროდუქციამ პირველად 1882 წელს სანკ-პეტერბურგში მოიპოვა, სადაც საერთაშორისო გამოფენაზე უმაღლესი ჯილდო - გრან-პრი დაიმსახურა.
ახლა, 125 წლის შემდეგ, "ბაგრატიონი 1882" დიდი პოპულარობით სარგებლობს არა მხოლოდ ადგილობრივ ბაზარზე, არამედ მთელ კავკასიაში.
შავი ზღვის პირას მდებარე, კავკასიონის მთებით გარშემორტყმული საქართველო მეღვინეობისა და მევენახეობის სამშობლოა. კომპანია დიდი პასუხისმგებლობით ეკიდება ქართული ღვინის კულტურისა და ტრადიციების შენარჩუნებას.