"გუდვილმა" ბათუმის ცენტრში ახალი ფორმატის ბულანჟერია გახსნა. გახსნის ოფიციალურ ცერემონიას ქალაქ ბათუმის მერი რობერტ ჩხაიძე და გუდვილის ხელმძღვანელობა დაესწრო.ბულანჟერია მემედ აბაშიძის ქუჩაზე მდებარეობს.
"ეს არის ერთ-ერთი ყველაზე ძველი და ლამაზი ქუჩა ბათუმში. ჩვენნაირი ტიპის ბულანჟერია ამ ქალაქში პირველია. ვიმედოვნებ, ვიქნებით ინიციატორები, რომ მსგავსი ტიპის კაფეტერიები თუ ბულანჟერიები ბათუმში მომრავლდეს. ქუჩის არქიტექტურა, მდებარეობა ძალიან ხელსაყრელია ტურისტების მოსაზიდად. ეს იქნება "მეორე შარდენის ქუჩა," რომელიც დასვენებისა და განტვირთვისთვის სრულ კომფორტს შეუქმნის ბათუმის ნებისმიერ სტუმარსა თუ ადგილობრივ მაცხოვრებელს"- განაცხადა "გუდვილის" გენერალურმა დირექტორმა მიხეილ ჩარკვიანმა.
ბულანჟერია "გუდვილის" ახალი ბრენდის, "მარშეს" სახელით დაიწყებს ფუნქციონირებას. მისი ინტერიერი კლასიკურ სტილშია გადაწყვეტილი. შეთავაზება კი საკმაოდ მრავალფეროვანია. აქ წარმოდგენილი იქნება ფრანგული რეცეპტურით დამზადებული პურ-ფუნთუშეული, დესერტები, კრუასანები, ტორტები.
"იქნება ყავის ფართო არჩევანი, ცნობილი ფრანგული კრუასანები. მსუბუქი, დაბალკალორიული დესერტები. არჩევანი საკმაოდ დიდია და ფასებიც ყველასთვის ხელმისაწვდომი. ნებისმიერი ჩვენი სტუმარი თავს იგრძნობს მყუდრო გარემოში, ყავის სურნელისა და ახალი პურ-ფუნთუშეულის არომატში. ასეთი ბულანჟერიები ბევრია ევროპაში და დარწმუნებული ვარ საქართველოშიც წარმატებული იქნება. პირველ ეტაპზე 15 ადგილობრივი მაცხოვრებელი დავასაქმეთ, ზაფხულამდე კი ეს რიცხვი გაორმაგდება."- აცხადებს "გუდვილის" გენერალური დირექტორი მიხეილ ჩარკვიანი.
"გუდვილი" ბულანჟერიის გაფართოებასაც აპირებს. ზაფხულამდე ბულანჟერია "მარშეს" ახალი ფილიალი ისევ ბათუმში გაიხსნება, მოგვიანებით კი თბილისსაც მოიცავს.
